Ngelnghet taka khelh a ngai - Lampard

Chelsea manager Frank Lampard chuan tun hnai an chak loh danah chhuanlam siam a tum lo a, ngelnghet takin ṭha taka khelh theih chu an mamawh ber a nih thu a sawi chhuak.

Blues hian player lei thei loa an hremna an hmang zo tawh a, Ajax playmaker Hakim Ziyech an lak hnuah tun hnai khan RB Leipzig striker Timo Werner an lei fel leh tawh bawk - season thar atan an phur tawh hle. July 11, Inrinni zan khan Premier League-ah Lampard-a naute hi Sheffield United 3-0 a hneh loin an mualpho. Bramall Lane-a an chak loh ni hian an player thar Ziyech chu Blues training kit nen Cobham Training Centre-a hun a hmang lai chu an pho chhuak bawk.

Mi ṭhenkhat chuan Chelsea hi inkhelh aia player thar ngaihven leh atchilh tiin an sawisel a, fans ṭhenkhat pawhin an hna hmasa atan EPL table-a a sang pali zinga tel chian phawt a pawimawh zawk thu an sawi bawk a ni. Blues manager Lampard chuan, "Chelsea player i nih chuan Premier League-ah i theih tawpin i khel tur a ni a, thildang ngaihtuah hman a ni lo. Pawn lama sawiselna kan dawnte pawh chhang let reng hman kan ni lo, kan hna chu inkhelh a ni rih.

"Player thar kan neih vangin lawm tur a ni, chumi aia pawimawh zawk chu inkhel hnehna chan a ni. Kan chet fuh leh fuh lo ni a inthlau lutuk a, goal chhuah tlem chunga hnehna chan hi ngaiah kan neih theih a ngai," a ti. Pathumna ni lai Chelsea hian zanin dar 12:45 hian tla chiang tawh Norwich City an hmachhawn dawn, an hmabakah Liverpool leh Wolves an la awm avangin zanina point thum hmuh a pawimawh zual hle ang.