Van de Beek-a'n chhuah a tum lo

Manchester United-in January transfer-a lak an tum Ajax midfielder Donny van de Beek chuan season tawp hmaa chhuah a tum loh thu a tichiang.

United manager Ole Gunnar Solskjaer chuan Netherlands international hi midfield tichak thei turah a ngai a, Ajax-in Champions League group stage an patlang loh avangin club hotute pawhin lak theih an inbeisei.

Chutihrualin Real Madrid pawhin pound maktaduai 50 man vela ngaih Van de Beek hi an ngaihven ve reng a, Dutch midfielder hian tun season-ah Ajax tan match 26-ah goal riat a khung tawh.

Qatar-a Ajax leh Club Brugge-in friendly match an khelh zawhah Van de Beek chuan, "Ka duh vanga thil thleng thei a ni ringawt lo. A hmaa ka sawi ang thoin tun season chhung chu Ajax-ah ka cham dawn. Season tharah pawh ka cham chhuznawm thei bawk," tiin chhuah a tum loh thu a sawi.

Van de Beek chuan sawi chhunzawmin, "Real Madrid leh Man United ten min duh thu an ziak hi ka tan chuan chanchin ṭha a ni a, tunah erawh a pawimawh rih lo. Ajax tan 100% ka pe dawn," a ti. United-in Dutch midfielder hi an duh a nih chuan nipui transfer an nghah a ṭul dawn. United hian Bruno Fernandes chu Sporting Lisbon aṭangin an lalut dawn tih thuthang a awm. English club hian Sporting captain lakluh tum hian euro maktaduai 60 bakah Marcos Rojo pek belh an inhuam tih te a awm bawk.