Spurs lakah Arsenal an tlawm

Arsenal chu an elpui leh hmelma ni bawk Tottenham lakah 2-1 in an tlawm. Mikel Arteta naute tan European football beiseina a thamrala ngaih theih a ni - Jose Mourinho erawhin Europa League khelh tum zingah an la tel thu a 

sawi thung.

Pathianni zan Premier League inkhelah Alexandre Lacazette goal hmangin Gunners lamin hma hruai mah se Son Heung-min chuan a sut a, South Korean tlangval hian Toby Alderweireld tauh luh tur a siamsak zui leh bawk.

Gunners hian Nilaini zanah champion Liverpool chu Emirates Stadium-ah an mikhual zui dawn a, hmabakah Aston Villa leh Watford an la awm bawk. Tottenham pawhin Newcastle United an lenchilh ve thung dawn, a hnuah Leicester City leh Crystal Palace an tum leh dawn.

Tottenham Hotspur Stadium-ah entu awm lo mah se North London Derby boruak chu a rit tho, boruak sang tak karah Lacazette chuan box pawn aṭangin goal kilah a hlap lut - Spurs keeper Hugo Lloris tan dan theih a ni lo.

Minute 16-naah goal an chhuah a, goal an chhuah aṭanga minute thum pawh a liam hmain Tottenham lamin an sut zui nghal. Sead Kolasinac back pass fuh tawk lo chu tha ṭhum tawh David Luiz tan lak hman a ni lo a, tha zâ lai Son-a'n mawi takin keeper Emiliano Martinez a chip khum.

Spurs defender Ben Davies-a'n yard 30-a hla aṭanga a pet kawh tak mai chu Martinez-a'n khawih fuh zauh lo se chuan a lut chiang khawp ang - bar a per dawp. Gunners captain Pierre-Emerick Aubameyang pawhin hnai tak aṭangin goal kham a pet per bawk. Hun tawp nan minute kua chauh a awm tawh, Spurs corner hmuh chu Son-a'n chhuihin Alderweireld chuan chiang zetin a tauh lut. Belgium defender 6ft 2in a sang vengtu Kieran Tierney chu 5ft 10in chauha sang a nih avangin a tan tih theih a awm lo.

Arsenal manager Mikel Arteta chuan, "Mimal tihsual leh set-piece kan tuar, inven theih a ni. Inkhel thunun tak kan nih chuan khingpui beiseina tih tawpsak tur kan ni a, mahse goal kan khung belh thei si lo. Chak lo mah ila ka naute khelh danah khan lawmna tur tam tak ka hmu," a ti.

Gunners midfielder Granit Xhaka leh Dani Ceballos ten inkhel an thunun a, ball an chang tamin an inpe kual hnem hle - Lacazette leh Auba tan pawh hun ṭha an siamsak nual, mahse an vanneih ni a ni lo. Pound maktaduai 72 man Nicolas Pepe chu goal hmaa a chet dan leh a man zat a la inbuk tawk lo. Spanish manager Arteta-a'n tlarhnungah Luiz, Kolasinac leh Shkodran Mustafi te a ring chhunzawm a, phui lo lai a tam. Harry Kane-a'n ṭhum hnih chiang zetin a paltlang a, forward Son-a khung tur pawh Martinez chuan a lo dansak hlauh - Argentine keeper hian Bernd Leno hmunruak a luah zo hle.

Tottenham manager Jose Mourinho chuan, "Inkhelh lai khan tumahin kan dinhmun min ngaihtuah pui lo, kei ngei pawhin darkar 48 zetin hahchawlhna hun kan nei tlem zawk tih kha ka ngaihtuah tawh lo. Ṭhahnem ngai takin ka naute khan an theihna zawng zawngin an bei a ni.

"2-1 a nih tawh hnuah kha chuan engkim kan thunun a, harsatna a awm tawh lo. Hnehna kan chan avangin fans an lawm ang. Europa League khelh kan la beisei thei reng, point kua hmuh theih la awmah a tham thei ang hlawh chhuah kan tum ang," a ti. Portuguese manager hian tun hma lama team enkawl a ṭhin tawh ang bawkin a naute a remkhawm pui ṭha a, ball chang tlem tak chung siin hnehna an chanpui - an inkhel hmuhnawm loh mah se point thum an hmu; Gunners an hmachhawn hma hian Spurs chu nomawi chawipui a tum thu a sawi lawk.

July 12, Pathianni

Wolves    3 - 0    Everton

WOL : Raul Jimenez 45+2' (P); Leander Dendoncker 46'; Diogo Jota 74'

Aston Villa    2 - 0    Crystal Palace

AST : Trezeguet 45+4', 59'

Tottenham Hotspur    2 - 1    Arsenal

TOT : Son Heung-min 19'; Toby Alderweireld 81'

ARS : Alexandre Lacazette 16'

Bournemouth    4 - 1    Leicester City

BOU : Junior Stanislas 66' (P); Dominic Solanke 67', 87'; Jonny Evans 83' (OG)

LEI : Jamie Vardy 23'