Real Ropuina Ronaldo

Cristiano Ronaldo hattrick hmangin Real Madrid chuan Santiago Bernabeu-ah Bayern Munich 4-2 a hnehin Champions League semifinal an lut. Ronaldo hian Champions League bikah goal 100 a khung ta!

Portugal captain tih loh hetiang zat goal thun thei hi an la awm ngai lo - European competition hrang hranga a goal 103-na a ni bawk.

Spanish club lian Real hi Eu­­­­­­­­­­­rope-a club liante inelna Euro­pean Cup/Champions League-ah a zawnin kum sarih chhung a sang pali zingah an telna a ni a, record thar a ni. Real Madrid fan-te tan Thawhlehni zan inkhel hi theihnghilh theih a ni tawh lo ang.

Kar hmasa khan Allianz Arena-ah first leg khelh a ni tawh, mikhual Real-in Ronaldo goal hnih hmangin 2-1 in hnehna an chang. Bayern tan semifinal lut turin a tlem berah goal hnih tal khung a ngai.

Santiago Bernabeu-ah Ger­man champion hian Robert Lewan­dowski penalty chhuih luh hmangin awmze nei beiseina a nei a, Real-in Ronaldo hmangin sut mah se captain Sergio Ramos chuan an mahni lamah a tilut. Mikhual Bayern dinhmun a ṭha tawh zawka a lan hnuah Arturo Vidal chu minute 84-naah yellow card pahnihna hmuh vangin hnawhchhuah a ni a, minute 90 chhunga Bayern chakna zat 2-1 chu Real-in Allianz Arena a an chakna zat a inang chiah avangin extra time khelh a ngaih phah.

Extra time-ah player tlem zawk Bayern an tho chhuak tawh lo. Ronaldo-a'n goal hnih a khung belh bakah substitute Marco Asensio chuan chak nemnghetna goal a khung. Inkhel pahnih belhkhawmah Real Madrid 6-3 in an chak a, scoreline thlirin Spanish club hi chak chiangin lang mah se extra time khelh a ṭul a, Real hian first leg leh second leg-ah German club 10-a an khelh hnuah goal thum an khung avangin Los Blancos hi inchhuang thei an ni lo.

Ronaldo chu Ronaldo
"Cristiano chu hun pawi­mawhah a lang leh ṭhin. Kan ma­mawh hunah chhanna dik min pe zel - danglamna thlentu chu ani hi a ni," tiin Real Madrid manager Zinedine Zidane chuan a player duhlai chungchang a sawi.

Champions League bikah kum 32-a upa Ronaldo hian Bayern Munich lakah goal kua a khung ta. Lionel Messi-a'n Arsenal lakah goal kua bawk a khung - anni pahnih hi club pakhat laka goal khung hnem ber an ni.

Thawhlehni zan inkhel bikah Ronaldo hian minute 76-naah Casemiro-a cross a tauh lut. Extra time-ah Ramos hnen aṭanga a ball hmuh chu a awma dawngin chiang zetin a hlap lut. Real-in an goal hnihna an khung danah Ronaldo hi a offside ngei niin lang mah se assistant referee-in a phar lo!

Ronaldo hian Champions League-a a goal 100-na khung turin Marcelo puihna a mamawh. Brazil international defender hian Bayern player pathum a paltlang hnuah keeper Manuel Neuer chiah a hmachhawn tawh tihin Ronaldo tan a siamsak - Marcelo hian fak a phu.

Tun season La Liga-ah Ronaldo hian match 24 a khelh aṭangin goal 19 a khung a, sawisel a tawk! Tunah chuan amah demtute a changlet leh thei ta; Ronaldo chuan, "Inkhel zawng zawngah hian ka theihtawp ka chhuah ṭhin, goal ka khung emaw khung lo a nih pawhin team tana ṭha thei tur ang berin ka khel ṭhin," a ti.

Bayern tan a nâ
Allianz Arena-ah midfielder Javi Martinez hnawhchhuah a nih avangin Bayern hian hun tawp lam minute 30 chhung chu player 10 ni chungin an khel. Bernabeu-ah Vidal hnawhchhuah a ni ve thung a, hun pangngai minute ruk bakah extra time zawng chu a tlem zawkah an ṭang.

Chile international Vidal hi minute 5-na lekah Isco laka a foul avangin yellow card pek a ni a, hun tawp dawna Real Madrid midfielder Marco Asensio ball a laksak danah erawh tihsual a nei lo niin a ang. Mahse, Hungarian referee Viktor Kassai-a'n Vidal hi a hnawk chhuak.

Bayern manager Carlo Ancelotti chuan, "Tihsual a tam lutuk! Quar­terfinal a ni tawh a, referee ṭha zawk neih a hun tawh. UEFA-in a buaipui mek video refereeing hi hman a hun tawh," tiin referee te thutluknaa a lungawi loh thu a sawi.

Real Madrid manager Zidane ngaihdan a dang thung, France legend chuan, "Referee thutluknaah khan ka inrawlh loh avangin a dik leh dik loh ka sawi thei lo. Mitinin ngaihdan kan nei ṭheuh a, Vidal chungchangah khan a ṭhenin red card an pawrh laiin a ṭhen chuan an phawrh kher lo ang," a ti. Zidane hian Ronaldo goal khung chu offside vangin pawm pawh ni lo se inkhel result a danglam phah a rin loh thu a sawi tel bawk.

German champion Bayern hi Pep Guardiola kaihhruaina hnuaiah a zawnin season thum chhung semifinal-ah an tla tawh a - La Liga club Barcelona, Atletico Madrid leh Real Madrid a ngam lo. AC Milan leh Real Madrid manager hui Ancelotti-a'n a season khatnaah quarterfinal a paltlang pui zo lo thung.

Bayern captain Philipp Lahm leh Spain international hlui Xabi Alonso ten season tawp rualin inkhelh an chawlhsan tur thu an ti chiang tawh a, European football a sulhnu nei ṭha player pahnih tan Bernabeu hi Champions League match an khelh hnuhnun berna hmun a ni ta.

Ngaihnawm
• Cristiano Ronaldo hi Champions League chanchina goal 100 khung tling thei hmasa ber a ni. Ronaldo-a'n goal 100 a khung tlin zan hian Real ṭhenawm club Atletico Madrid chuan UCL-a an goal 100-na an khung ve chiah!
• Madrid hi tun hnaiah a zawnin season sarih chhung Champions League semifinal an lut ta a, record nei ṭha ber an ni.
• Kum 2014 April hnuah Bayern hi Champions League knock out stage chinah inkhel pahniha an chak loh lehna hmasa ber a ni, vawi hnih an hneh loh hnuhnun ber hi Real tho a ni.
• Lewandowski-a'n Champions League match bikah Real Madrid lakah goal ruk a khung tawh a, player mal goal khung hnem ber a ni.
• Arturo Vidal kha Bayen Munich tan Champions League-a player hnawhchhuah 19-na chiah a ni. Bayern tih lohah chuan Juventus (22) chu red card hmu hnem ber an ni.
• Bayern inkhel bul ṭantu player-te kum chawlhrual kha kum 30 leh ni 116 an ni a, Champions League-a inkhel bul ṭantu an neih upat ber ṭum a ni.