Aizawl FC tana goal pawimawh khungtu Mizo

India rama football hmanga inelna sang ber I League-ah Aizawl FC chu champion thei dinhmunah an ding a, foreigner pawimawhna sawi nep theih a ni lo nachungin Mizo club chakna hnar chu Mizo player-te an ni.

Brandon VL Rem­dika'n goal thum a khung a, hetiang zat bawk hi Sialhawk tlangval R. Laldanmawia'n khung tawhin, Mizo defender pahnih Lalramchullova leh Lalruatthara ten goal khat ve ve an khung bawk.

Brandon-a goal thum hmangin Aizawl FC hian point sarih an hlawh chuak. Goal a khungte hi inhkela goala wm chhun vek a ni. AFC winger Brandon hian Chennai City leh DSK Shivajians lakah chakna goal a khung bakah RG Stadium-a Bengaluru FC nen 1-1 a an inhnehtawk ṭumin goal a thun.

Sialhawk tlangval Danmawia hian sulhnu a neih ṭhat em avangin nomawi a keng tel tia sawi ṭhin a ni - veng leh veng inelnaa Durtlang, Chanmari leh Ramhlun South champion pui tawhtu hian MPL hmasa berah Dinthar FC a champion pui tawh.

Mizoramin Santosh Trophy an champion ṭum khan final round luh theih nan Lammualah Manipur lakah goal pawimawh a khung a, National Sub Junior Championship-ah Mizoram a champion pui tawh bawk.

Aizawl FC tan pawh Dan­mawia a hlu a, khualmualah Pune club DSK lakah goal awm chhun khungin RG Stadium-a Kolkata club lian East Bengal laka goal awmc hhun khungtu a ni. AFC match hnuhnung berah Churchill Brothers lakah goal thumna a khung a, chakna goal ni lo mah se goal hlu tak a ni.

Danmawia'n goal a khungin AFC an chak vek a, Lalruatthara leh Lalramchullova te goal khung ṭumin Mizo club an chak ve ve bawk.

Aizawl FC tan Mizo player-te an hlu ang bawkin foreigner leh state pawn player-te an ṭangkai a, coach Khalid Jamil-a'n team thawhhona ṭhat avanga tun dinhmun thleng thei an ni tih an khelh dan thlirin a chiang.

Bayi Kamo hian goal ruk khungin lang mah se, East Bengal lama own goal chu official-in Kamo thun angin an ziak lut!

April 22, Inrinni chawhnu hian Aizawl FC leh Mohun Bagan ten I League champion tur an zawng dawn a, RG Stadium-ah entu mipui an tam ang.

AFC tana goal khungtute
Hming Goal
Bayi Kamo Stephanie 7
Brandon VL Remdika 3
R. Laldanmawia 3
Jayesh Rane 2
Mahmoud Al Amna 2
Ashutosh Mehta 1
Lalramchullova 1
Lalruatthara 1
Loveday Okechukwu (OG) 1
Banpynkhrawnam Nongkhlaw (OG) 1
Total 22