Zaninah Tuikual South leh Mission Veng

Mizoram Super League inkhel ngaih­nawm zingah season liam ta semifinal-a Tuikual South leh Mission Veng Vikings inkhel kha hriat reng a ni tawh. Tuikual South mipuiin final an lut tih an hriat chian veleh Mission Veng mipui an 'bye bye' a, Vikings ṭantuten an theihngilh kher lo ang.

Zanin dar 8:00 hian Hawla In­door Stadium-ah Tuikual South leh Mission Veng an inhmachhawn dawn. Phengphehlepin semifinal an lut tawh a, an hna tur chu Vikings semifinal kalkawng dal a ni a, an châk zawk tak tur a ni.

TKS an him!

Tuikual South hi table-ah palinaah awmin pangana Chanmari Hollow nen point nga ve ve hmu mah se match hnih khelh tur an la neih avangin semifinal an lut chiang tawh. MSL-ah chak lo team-in point khat an hmu a, hei vang hian TKS hian an match hmabak Vikings leh Khatla TBL an hneh loh a nih pawhin point sarih an hmu ang.

TKS hian Hollow hi 87-80 in an hneh tawh a, MSL kaithar Hollow hian an match hnuhnung bera Zarkawt Serpents an hneh pawhin point sarih bak an tlin thei tawh lo. Phengphehlep himna chhan chu an elpui theih tur Hollow aia head to head-a an ṭhat zawk vang a ni.

Vikings an him lo

Mission Veng hian Tuikual South an hneh loh a, Khatla TBL-in TKS an hneh bawk chuan tla thei an ni. Vikings hian Hollow a hneh lo a, hei vang hian zanina an chak loh chuan inkhel dang result-ah an innghah a ngai - a him lo.

Vikings coach Reuben Lalchhandama chuan, "Kan match hmasa pahnih kan chak loh avangin kan tan chuan kan khelh apiang hi knockout ang vek a ni tawh," tiin an team dinhmun a hrechiang hle.

Cho leh cho

Tuikual South-in champion tumin Amjyot Singh leh Palpreet Singh Brar te an lalut a, amaherawhchu tun ṭumah hian player pahniha langsar zawk Amjyot chu Australia-a trial an neih avangin a tel thei dawn em tih a chiang lo.

TKS coach KC Lalliantluanga chuan, "Semifinal kan luh tawh avangin kan tan chuan pressure a awm lo. Kan inbuatsaihna a ṭha a, chak tumin kan khel dawn a, Pathian thu thu a ni," tiin chak ngei an tum thu a sawi.

Mission Veng erawhin American player Ronald March leh India Rikin Pethani te an chhawr thei dawn a, match zawna an chak tawh bawk avangin zaninah pawh chak tura rinkai an ni.

Vikings coach ChD-a chuan, "Pla­yer-te an dam kim a, Hollow leh BCA kan hneh loh ṭuma kan team boruak leh tun chu danglam tawh tak a ni. Inkhel pawimawh a nih avangin rilru a pawimawh dawn a, vengchhung leh pawna min ṭantute zan dang zawng aiin kan mamawh ang," tiin mipui pawimawhna a hrechiang hle.