Leicester mang ram a tawp ta

Premier League champion Leicester City-in season hmasaa an thil mak tih thlen nawntir turin Champions League-ah hun ṭha nei mah se an kalkawngah Atletico Madrid an ding a, an mang ram chu tihtawpin a awm ta - Thawhlehni zan khan Foxes hian an mikhual Atletico chu 1-1 in an inhnehtawkpui a, khualmualah 1-0 a an tlawm tawh bawk avangin inkhel pa­hnih belhkhawmah 2-1 in an tlawm.

Foxes manager Craig Shakes­peare-a'n inkhelh hmaa chhuang taka 'kan khelmual a ni miau alawm' tia a sawi King Power Stadium-ah Eng­lish coach sawi ang ngeiin Leicester-in inkhel an thunun a, mah se minute 26-naah Atletico tan Saul Niguez-a'n goal hmahruai a khung avangin chak tura goal thum mamawh Foxes tan thawhleh ngaihna a awm tawh lo - Atletico tana Saul Niguez goal hmahruai hi Atletico-in Champions League match 68 an khelha an goal 100-na chiah a ni. Foxes tan Jamie Vardy chuan goal khat khung ve mah se awmzia a nei lo.

Foxes an huaisen

Leicester City-in an Cham­pions League zinkawng an

ṭantirh khan last 16 an lut a nih chuan hlawhtlinnaah chhiar a nih tur thu sawi a ni a, beisei aia sang thlengin quarterfinal hial an lut - an kalkawng daltu hi season thum chhunga vawi hnih final lut thei Atletico an nih avangin a thiam pariat zing aṭanga paihthlak nih hi Foxes tan zahna tur chi a ni lo.

Atletico-in goal hmahruai an khung hnuah Foxes-in chak turin goal thum an mamawh a, sual let lo pawh ni se dem theih an ni lo. Mahse, Shakespeare-a nauten Premier League champion zia chhuahin a tawp thlengin an bei a, team huaisen an nihzia hmuh turin a awm nawn.

Vardy goal

Shakespeare-a'n thutlukna fing siamin second half-ah sub­­stitution awmze nei a siam a, Shinji Okazaki leh de­fender Yohan Benalouane la chhuakin Leonardo Ulloa leh Ben Chil­well a luhtir a, tlarhmaah Var­dy-a'n thlawptu a nei ṭha sawt. English striker hian minute 61-naah an si phurh sutna goal a khung ta nge nge a, a goal hnihna tur ni ngeia lang Stefan Savic-a'n a lo dan hman te chu a ui khawp ang.

Foxes-in theihtawp chhuah chhunzawm mah se first leg-a penalty sawisel hlawh tak hmanga Antoine Griezmann-a goal khung an tuar a, goal hnih dang khung turin hunin a daih tawh lo - mahse Foxes fan-ten an player-te thawhrimna an hmuh hmaih lo a, standing ova­tion nen an player-te chungah zahna an lantir.

Fak phu Atletico

Leicester City fan-ten King Power Stadium an luah khat hneh a, hmun tinah banner hmuh tur a awm a, halmawi mawi tak tak hal reng a nih bakah stadium chhung chu club rawng a pawlin a khat vek - tawnhriat ngah lo team tan chuan zamna tham a ni a, hlaua khurhna tham a ni.

Mahse, Atletico player-ten an pu Diego Simeone zia chhuahin an thiamna, tawnhriat ngahna leh rilru huaisen an pholang a, kum 2014 leh 2016-a Champions League final lut an ni tih hriatreng turin an hnutchhiah - tunah chuan kum li chhunga Champions League final vawi thum lut turin team pakhat chiah paltlang a ngai ta.

Eng nge an sawi?

Leicester manager Craig Shakespeare chuan, "First half-ah khan kan khel ṭha takzet a, mahse goal kan chhuah tak avangin game plan angin kan kaltlang thei lo. Goal thum khung kan ngaih avangin player siksawi ka ngaih phah a, kan team ngam loh kha en ila, hrehawm ti lutuk tur kan ni lo. Team kan nih ang ngeiin ṭha takin kan khel chhuak a, zanin zet chu kan 'zan' a ni lo a ni. He club hian hna ropui tak kan thawk a, kan thlen chin hi kan chhuang tur a ni," a ti.

Atletico Madrid manager Diego Simeone chuan, "Ka team-te khelh dan khan min ti lawm a, ka chhuang takzet a ni. Chutihrualin Leicester khelh dan kha sawi lan loh phal chi a ni lo a, an khelh ṭhat em avangin anni kan hneh thei hi ka lawm takzet a ni," tiin Premier League champion team a fak.