Chelsea hneh a ngai - Kane

Tottenham Hotspur striker Harry Kane chuan tun season-a nomawi pahnih an chawi theih nan Chelsea hneh a pawimawh thu a sawi. Spurs leh Blues hi FA Cup semifinal khel turin Pathianni zan khian Wembley-ah an intawng ang.

Spurs hian kartawp Premier League-ah Bournemouth 4-0 in an sawp a, inkhel dangah Chelsea chu Manchester United lakah 2-0 in an tlawm thung. Blues hian league match khelh hmabak paruk la awmah pahnihna Spurs aiin point li chiahin an sang fal tawh.

England international Kane chuan, "Kan inkhel tur hi taksa bakah rilru khawih thei thil a ni dawn. FA Cup final luh hi ka duhin kan tum lian tak a ni, chutihrualin league-a Chelsea lehpelh hi kan tum a ni bawk. Nomawi pahnih chawi kan duh a nih chuan an laka hnehna chan hi hna pawimawh hmasa a ni," tiin a sawi.

Tottenham hian tun season league match 32 khelh tawh aṭangin point 71 an hmu a, season hmasa pumpuia an hmuh aiin point khatin a tam tawh zawk. Kum 2013 khan Andre Villas-Boas kaihhruaina hnuaiah point 72 an hmu tawh a, hei hi an club record a ni - kuminah an khum ngei a rinawm tawh hle.

Kum 23-a upa Kane chuan sawi chhunzawmin, "Rinkai kan ni lo tih ka hria, mi tam zawk chuan Chelsea hi champion tura an rin ber a ni. Mahse, season kan hman chhoh dan hi thlir kir ila, hlawhtlinna tawng turin kawng thui zawh a ngai tawh lo tih a chiang," tiin a sawi.