AFC Cup-ah Bengaluru an tlangnel

I League champion Bengaluru FC-in an nomawi humhim thei tawh lo mah se AFC Cup-ah erawh club lian zia an chhuah chhunzawm zel a, Thawhlehni zan khan an mikhual Abahani Limited Dhaka chu 2-0 in an hneh.

Kanteerava Stadium-a inkhelah season hmasa finalist tan Nishu Kumar chuan minute 40-naah goal hmahruai a khung a, Serbian striker Marjan Jugovic chuan hun tawp nan minute riat chiah a awm tawh tihin chakna goal a khung bawk - kum 33-a upa striker hi Bangalore khawpuia Aizawl FC lama chakna goal khungtu kha a ni.

Bengaluru tan Mizo player an langsar a, hliam vanga hun rei tak a chawlh hnuin tun season-a a vawi khat nan Lalthuammawia Ralte chuan si ban nghakin inkhel bul a ṭan nghal a, Champhai tlangval hian goal chhuah loin minute 90 chhung hun a hmang.

Serchhip striker Daniel Lalhlimpuia'n ṭum dang ang bawkin inkhel bul a ṭan a, defender Nishu Kumar goal hmahruai khung hi Daniel-a siamsak a ni. Malsawmzuala'n inkhel bul ṭan lo mah se minute 75-naah tlanluhtir a ni a, Chaltlang midfielder hian Bengaluru tan khelh a phuzia pholan nana hmangin an goal hnihna luhna kawngah a thawhhlawk hle.

Albert Roca nauten AFC Cup match thum an khelh tawhah hnehna chang vekin Group E-ah table chung ber an luah chhunzawm zel a, season hmasaa an chet ṭhat tawhna chhawm nung turin kawng dik an zawh zel.