Zanin dar 12:35-ah Manchester United Vs Anderlecht
Europa League semifinal lut tur zanin hian a chiang dawn a, Manchester United-in Old Trafford-ah Anderlecht an mikhual dawn.
Brussels-ah Henrikh Mkhitaryan hmangin away goal nei mah se Belgian club-in Leander Dendoncker hmangin an sut. Constant Vanden Stock Stadium-ah chak zawk an awm lo a, zanin dar 12:25 hian chinfel a ni dawn. Inkhel hi Ten 2 leh Ten 1 HD-ah a en theih ang.
Chelsea hneh hlim
Kartawpah United-in Premier League hmahruaitu Chelsea an hneh a, an chakna hmun Old Trafford-ah hian Europa League-ah record ṭha tak an neih avangin semifinal an thlen zawh loh chuan 'upset' a ni ang.
Jose Mourinho-a'n a club hlui Blues a hneh ṭumin club top scorer Zlatan Ibrahimovic chu hachawlhtir a ni a, Marcus Rashford a awm avangin Swede forward-in inkhel bul a ṭan lo hi a langsar lo hle.
Kum 19-a upa Rashford hian goal hmahruai a khung a, English forward hian a tlan chakna hmangin Chelsea tlarhnung a chhaih buai fo bawk avangin United boss Mourinho pawh a khelhdan a lungawi.
Amaherawhchu, Belgian club hmachhawn turin tawnhriat nei ṭha Ibrahimovic a inpeih leh tawh a, Rashford-a'n khelhna hmun a chang a nih pawhin a hna a ngai a chan rinawm loh. English forward hi Swede forward puitu zawk a nih a rinawm.
United keeper David de Gea-a'n Chelsea nen dan tur a nei lo a, Spanish keeper khelh danah sawisel tur awm lo mah se Belgian club nen erawh Europa League-a vawi riat inlan tawh Argentine keeper Sergio Romero a inlan a rinawm zawk.
Dinhmun ṭha United
Manchester United hian Jose Mourinho hnuaiah Europa League-ah vawi hnih an chak lo a, group stage-a Feyenoord leh Fenerbahce an hneh loh ṭum hi khualmual ve ve a ni.
Old Trafford-ah erawh United hian Fenerbahce (4-1) leh Feyenoord (4-0) lamah goal li ve ve an khung a, Europa League bika vawi nga an khelhah an chak vek.
Quarterfinal thleng tur hian United hian Saint-Etienne leh Rostov an hneh a, heng club pahnih hian tun season-ah Anderlecht an hneh ve ve tawh. Russia club Rostov hi Anderlecht-in Champions League khel lo a, Europa League an khelh phahna chhan a ni.
Inkhel dang
Ajax-in Amsterdam Arena-ah Davy Klaassen goal hnih hmangin Schalke an hneh a, semifinal lut turin an dinhmun a ṭha.
Dutch club hian an league-ah kartawp khan Heerenveen 5-1 in an hneh bawk a, hetihlai hian Schalke erawh Darmstadt mualah 1-2 in an tlawm thung.
Celta Vigo-in an mualah 3-2 in Genk an hneh hram a, second leg a ngaihnawm dawn. Kartawpah Spanish club hian Arsenal legend kaihhruaina hnuaia khel Granada chu 3-0 in an sawp a, Genk pawhin 3-0 in Kortrijk an sawp bawk.
Besiktas-in kartawpah match khelh tur an neih loh laiin an khingpui tur Lyon erawh Bastia nen an inkhelh laia buaina a chhuah avangin an khel zo lo. Lyon hi chau zawk tura ngaih ni mah se first leg-ah 2-1 a an chak tawh avangin mahni muala khel tur Besiktas dinhmun a ṭha zawk lo.
Quarterfinal - 2nd Leg
Zanin Inkhel Tur
12:35 PM Man United Vs Anderlecht
12:35 PM Genk Vs Celta Vigo
12:35 PM Schalke Vs Ajax
12:35 PM Besiktas Vs Lyon
Quarterfinal - 1st Leg
Anderlecht 1 - 1 Manchester United
AND : Dendoncker 86'
MAN : Mkhitaryan 36'
Lyon 2 - 1 Besiktas
LYO : Tolisso 83'; Morel 85'
BES : Babel 15'
Celta Vigo 3 - 2 Genk
CEL : Sisto 15'; Iago Aspas 17'; Guidetti 38'
GEN : Boetius 10'; Buffel 67'
Ajax 2 - 0 Schalke
AJA : Davy Klaassen 23' (P), 52'