T20 run 10,000 siam hmasa ber Gayle

West Indies batsman Chris Gayle chuan Thawhlehni zan khan Royal Challengers Bangalore tan run 77 zet a vaw chhuak a, Twenty20 inelnaa run 10,000 siam tling hmasa ber dinhmun luahin Gujarat Lions lakah a team hi run 21-in hnehna a chanpui.

Gayle hian T20-a a run siam tam zawk hi RCB tana a siam niin Bangalore club tan hian run 3,283 ngawt a vaw chhuak a, West Indies tan run 1,519 a vaw chhuak bawk. Kum 37-a upa Gayle hian IPL bakah khawvel hmun hrang hranga T20 league-ah a khel kual a, run 10,000 siam tling tur hian century vawi 18 a vuak chhuah bakah half century hi vawi 61 ngawt a siam.

T20 cricket-ah run siam lama Gayle hnaih bertu Brendon McCullum chuan run 7,524 a tlin ve hram a, pathumna Australian batsman Brad Hodge chuan run 7,338 a siam tawh bawk.

Thawhlehni zan inkhelah hian RCB an bat hmasa zawk a, over 20-ah run 213 siamin wicket hnih chiah an hloh. Gayle bakah captain Virat Kohli chuan run 64 ngawt a siam bawk a, a tawp thleng dam Travis Head

(30 runs) leh Kedar Jadhav (38 runs) ten an thlawp ṭhat bawk avangin an dinhmun a him hle.

Gujarat Lions lamin theihtawp chhuahin RCB um mah se over 20-ah run 192 bak tlin loin wicket sarih an hloh a, run 72 siamtu McCullum-a'n thlawptu a neih ṭhat tawk loh tuarin an tlawm.

Zanin dar 8:00-ah inkhel pakhat a awm dawn a, Kings XI Punjab leh Mumbai Indians an inkhel ang.