Bulls dinhmun a ṭha zel

NBA Playoffs first round khelh mekah nimin zing khan Chicago Bulls chuan Boston Celtics 111-97 in an hneh. Bulls hian series-ah 2-0 in hma an hruai ta. Inkhel dangah Toronto Raptors leh Los Angeles Clippers ten hnehna an chang ve bawk.

TD Garden-a inkhelah Bulls tan hian Jimmy Butler leh Dwyane ten point 22 ve ve an score a, Robin Lopez (18 points) leh Paul Zipser (16) ten an khel ṭha hle bawk. Inrinni zing dar 4:30-ah game 3 an khel leh dawn.

Regular season-ah khan Celtics hian match 53 hnehna an chang a, Eastern Conference hmahruaitu an ni - Bulls erawh pariatna an ni thung. An conference-a a sang ber leh a hniam ber hi playoff-ah an intawng tihna a ni.

Kum 2012 khan table-a hmahruaitu Chicago chu parukna Philadelphia 76ers in an lo hneh tawh. Kuminah Bulls hian hnehna an chang thei a nih chuan Philadelphia 76ers angin playoff khel zinga a hniam ber ni chunga table hmahruaitu hneh thei hmasa ber an ni ang.

Bulls head coach Fred Hoiberg chuan, "Tun hnaia hnehna kan chan theihna chhan chu kan basket kan venhim ṭhat vang a ni. Team boruak a ṭha a, court chhunga awm apiangin theihtawp chhuahin an theihna zawng zawng an hman zel avangin keini aia team ṭha zawka ngaih lakah hnehna kan chang," tiin a sawi.

Inkhel dangah Clippers chuan Jazz chu 99-61 in an hneh a, series-ah 1-1 an ni chiah. Inrinni zing dar 7:30-ah Game 3 an khel leh ang. Eastern Conference table-a pathumna Raptors chuan match hmasa zawka an hneh loh Bucks chu 106-100 in an hneh let ve bawk; dar 5:30-ah an inkhelh ve leh bawk ang.