Goal khung lo Barca an tla ven thiam Juve an tlang

Juventus chuan Barcelona hnehin Champions League semifinal an lut. Nilaini zan Nou Camp-a inkhelah Barca-in goal an khung lo a, Italian defending game ropui khelhtirtu Massimiliano Allegri nauten Catalan club lakah minute 180 chhung an goal an venghim thei!

Kar hmasa khan Turin-ah first leg khelh a ni a, forward Paulo Dybala goal hnih leh Giorgio Chiellini goal khat hmangin Juventus 3-0 in an chak. Ropui taka Paris Saint-Germain lehthal thei Barcelona-in Juventus lakah an mamawh ber goal an neih theih miau loh avangin Comeback Part II hmuh tur a awm ta lo.

Juventus bakah hian Real Madrid, Atletico Madrid leh AS Monaco ten quarterfinal an paltlang, vawiin tlai hian Nyon, Switzerland-ah semifinal draw neih tur a ni dawn - June 3 khian Cardiff-ah final khelh tur a ni ang.

Juve goal a him!
Italian manager Allegri-a'n goal thum nei sa mah se an dinhmun a la him tawk lo tih a hria, tlarhnungah player pali Dani Alves, Leonardo Bonucci, Giorgio Chiellini leh Alex Sandro te an awm, kum 39-a upa Gianluigi Buffon-a'n si ban a nghak bawk. Barca ball inpe kual chhu chat turin Sami Khedira leh Miralem Pjanic an la awm cheu - an hna pawimawh hmasa chu goal venhim a ni.

Italian defender Chiellini-a'n inkhelh ṭan hmain an mahni goal hnaih lutukah Barca player awmtir a fuh loh tur thu a sawi, Juve tlarhnung hian Neymar leh Luis Suarez tan hmunawl an siamsak duh lo. Lionel Messi-a'n ṭum nga ngawt goal khung tumin pet mah se goal zawnah vawi khat chiah a kal, keeper Buffon-a'n a dan sak.

Juventus hian ball possession 35% chiah an chang. Barca hian goal khung tumin ṭum 19 zet pet mah se Messi bak goal zawna pet thei an awm lo. Champions League-ah Buffon-a'n clean sheets vawi 46-na nei turin hna harsa thawh tur a nei lo.

Champions League-ah Sir Alex Ferguson-a enkawl Manchester United (2007-08) leh German champion Bayern Munich (2012-13) te chuan inkhel pahniha goal chhuah loin an lo hneh tawh - Juve hi goal chhuah loa Barcelona hneh thei team pathumna an ni.

Fak ru Allegri
July 16, 2014 aṭangin Allegri-a'n Juventus a enkawl ṭan. AC Milan manager hlui hi Turin mipuiin an lawm lo a, Juve fan-te hian an manager thar an duh lohna an lantir hial.

Sawiselna karah Allegri a chiai duh lo. Serie A leh Coppa Italia nomawi pahnih a lak pui tawh. A season hmasa berah Champions League final hruai thlengin Barca lakah an tlawm, tunah chuan kum hnih liam ta a an hneh loh lakah phuba an la thei ta.

A tira an sawisel Allegri hi tunah chuan kum 1996 hnua Champions League nomawi an chawi leh theihna tura an beiseina siamsaktu a ni ta - Cardiff pan turin minute 180 chhung bak goal venhim an ngai tawh lo.

Kum 49-a upa Allegri chuan, "Hetianga hnehna chan hi chu Juventus tan chauha tih theih a ni. Barcelona lakah a zawna match hnih goal kan venhim theih chuan player zawng zawng an khel ṭha tihna a ni. Chutih rualin hei erawh hriat a ṭha, tunah hian nomawi kan la chawi lo - Cardiff pan turin kawng dik kan zawh mai chauh a la ni," tiin a sawi.

Barca an chuai
Season tawp rualin Luis Enrique-a'n a hna a chawlhsan dawn a, a hun hnuhnungah beisei ang result a nei thei lo. PSG lakah si li fai an phurh hnua an comeback theih avangin Juve lakah pawh beiseina an nei.

Mahse, PSG an hneh ṭuma Bar­ca ang kha Juve hmaah an lantir thei lo. Ligue 1 cham­pion goal-a vawi hnih khungtu Neymar chu Old Lady (Juventus sawina) hmaah a buai. Brazil captain hian vawi 46 zet ball a hloh! Tun season Champions League match khat a player mal ball hloh hnem ber a ni.

Barcelona manager Enrique chuan, "Champions League aṭanga kan tlak dan hi sawifiah vak dan ka hre lo. A chhan bulpui ber chu Turin a kan khel chhe lutuk kha a ni. Goal khung tumin bei ngial mah ila Juve kha an khat ṭha em em a, team ropui tak pahnih inkhelah a vanduai zawk ka ni," a ti. Spanih manager hian an tana pawimawh chu league nomawi humhim tura inbuatsaih nghal a nih thu a sawi tel bawk.

Barcelona hi La Liga table-ah pahnihna an ni mek a, an nomawi kawl lai chu Real Madrid laka chan thei dinhmunah an ding mek. Pa­thianni zanah El Clasico khelh a ni dawn - Enrique naute hi an chak lo a nih chuan an inkar­ah point ruk zet a awm tawh dawn, match khata an khelh tam zawk bawk avangin league title beiseina a tawp zui bawk ang.

Catalan club hian league bakah Copa del Rey final khelh tur an la nei. May 27 hian Alaves nen final an khel ang - Barca hian a season hmasa bera treble champion nih puitu Enrique hi ṭha taka thlah an duh a nih chuan tun season-a inkhelh hmabak an la neih hoah hnehna an chan zel a ngai tawh ang.