Jeje leh Bagan-in Mizoram an thleng

Nimin khan 2015 I League champion Mohun Bagan-in Mizoram an rawn thleng a, April 22 hian Aizawl FC nen Rajiv Gandhi Stadium, Mualpuiah an inhmachawn ang. Mizo tlangval Jeje Lalpekhlua chuan Mizorama I League a khel thei tur chu lawmawm a tih thu Vanglaini a hrilh.

Sanjoy Sen hian Mizo­ram hmachhawn turin Minerva Punjab an hneh ṭuma Ludhiana-a zinte bawk a rawn hruai a, squad-a awm thei zat player 18 bak a rawn hruai lo. Nimin khan RG Stadium-ah training an nei nghal a, vawiin hian I League match pawimawh khelh hmaa practice hnuhnung ber an nei leh ang.

Mohun Bagan striker Jeje chuan, "Mizoramah ngei I League khel tura ka lo haw thei hi kemah pawhin nuam ka ti. Tun ang hun ka lo suangtuah ve ṭhin kha a takin a lo thleng ve dawn a, mumang pawh a ang rum rum ten ka hre zawk. Mizo mipui te hmaah inlanna hun ka nei thei dawn a. Ka lawm khawp mai," tiin Mizoram chhung ngeia competitive match a khel thei chu lawmawm a tih thu a sawi.

Mizo striker chuan sawi chhunzawmin, "Ka football khelh tawhna zawng zawngah Mizo mipuite min support-na ka dawng nasa em em a, an mithmuh ngeiah inkhel thei a ka awm tur hi ka lawm khawp mai," tiin Mizo tihmingṭhatuin a hnunga ding tlat ṭhin Mizo mipuite a hre reng.

AFC hmachawn tur Bagan
Goalkeeper
24 Debjit Majumder
42 Shibinraj Kunniyil
Defender
14 Eduardo Soares Ferreira
45 Anas Edathodika
20 Pritam Kotal
3 Raju Eknath Gaikwad
4 Kinshuk Debnath
Midfielder
10 Katsumi Yusa
16 Sony Norde
6 Bikramjit Singh
33 Prabir Das
28 Sehnaj Singh
23 Souvik Chakrabarti
27 Pintu Mahata
Forward
12 Jeje Lalpekhlua
9 Darryl Duffy
15 Balwant Singh
35 Azharuddin Mallick