'LM Store' MFA Futsal Cup 2017

May 4, 2017 aṭangin Rajiv Gandhi Stadium-ah 'LM Store' Mizoram Football Association Futsal Cup 2017 chu neih ṭan a ni dawn. Futsal inelna pangngai bakah hian Veteran Category (Above 35) siam tel a ni dawn. Entry fee Rs 500/- niin MFA Office, City Park-ah April 28, 2017 thleng pek theih a ni.

Rajiv Gandhi Stadium-ah round hmasa lam khelh a ni a, a hmunhma a remchan dan azirin indoor-ah khelh chhoh tura ruat a ni a, mipui thlir theih tura telivision lama tihchhuah tura ruahman phawt a ni.

Tel theite:

MFA Futsal Committee chuan awmze neia Futsal bul ṭanna a nih vangin tun ṭumah hian tu tan pawha tel theih turin a rel a, futsal khel chak tute pawh a tel theih ang. Club/team awm sa a awm loh avangin he inelnaa tel tur hian eng team pawh siam chawp theih a ni phawt ang.

June, 2017 aṭangin futsal registration hi MFA-in a kalpui tawh dawn a, hemi hnuah hi chuan MFA hnuaia inziak lutte chiah MFA hriatpui futsal inelnaah hian a tel theih tawh dawn a ni.

'LM Store' MFA Futsal Cup 2017-ah hi chuan futsal tui mi tu pawhin team a din thei a, open category bakah veteran siam a ni dawn a, tun hmaa football khel ṭhinte tan pawh hun ṭha a inhawng dawn tihna a ni.

Hriat tur pawimawh

'LM Store' MFA Futsal Cup 2017 Draw and Kick-off neih a ni dawn a, May 1, 2017 chawhnu dar 1:00-ah Hawla Auditorium-ah (Near Vanapa Hall) neih a ni ang. He hunah hian team tel tur aṭangin mi pahnih aia tlem lo kal tur a ni a, hetah hian Futsal chungchanga hriat tur pawimawh sawi a ni ang.

MFA-in kumina Futsal tournament a butsaih hmasa ber turah hian player pariat aia tlem lo, 14 aia tam lo an inziak lut thei ang. Official hi pathum (Coach, Manager & Physio) thleng an awm thei ang.

Futsal Laws of the game ang taka khelh tur a ni a, dan phuahchawp hman a ni dawn lo a, chuvangin team tel tur chuan FIFA Futsal dan lo hriat lawk a ngai a, hei hi Mizo ṭawnga lehlin niin May 1-a Draw & Kickoff hunah sem a ni ang.

Lawmman

OPEN

1st Prize Rs 50000

2nd Prize Rs 25000

Semi-Finalist Rs 10000

Quarter-Finalist Rs 1000

VETERAN

1st Prize Rs 10000

2nd Prize Rs 5000

Semi-Finalist Rs 2500