Vikings leh Tuikual tan chak a ngai

Mizoram Super League (MSL) 7 a hmuhnawm zel a, a sang pali zinga tel tum inum boruak a sang. Vawiin tlai dar 5:00 hian chak mamawh team pahnih Tuikual South leh Chanmari Vikings te an inhmachawn dawn, inkhel a hmuhnawm ang.

Match riat an khelh tawh chinah TKS hian point 11 hmuin palina an ni, anmahni aia match khata khel tlem Vikings aia an sanna chu point khat chauh a ni. Tun ṭum an intawna result hian 'Play In' khel tur zawk a hril thui thei viau dawn a ni.

Boruak a ṭha
Tuikual South manager Lalchungnunga chuan, "Team chhung boruak a ṭha, match hnuhnunga fuh tawk lo awm kan siamṭha tawh. Vikings lakah Darrell Bowie a khel dawn," tiin Vanglaini a hrilh. Mission Veng Hotshots laka buaina nei Bowie harsatna an chingfel.

Phengphehlep tan chak loh a pawi thui thei, chutihrualin an chak a nih erawh chuan palina mai ni loin pathumna dinhmun pawh an la beisei ngam dawn. Coach Ricky Lallawmkima'n team a remkhawm fuh a nih chuan chak beiseina an nei ang.

Tawnhriat nei ṭha F. Zodinthara hi hun harsa an tawh lai pawha an innghahna a ni ṭhin, a kum tam deuh tawh mah se vawiin tlaiah chuan a lakah mawhphurhna a tla leh ngeiin a rinawm - Tuikual tlangval Dina kha kan hmuh leh ngei a rinawm.

Chak tum Vikings
An squad en chuan Chanmari Vikings hi champion thei tur zinga mi an ni, amaherawhchu season bul an ṭan fuh loh an la tuar zel. Vawiin tlaia an chak a nih erawh chuan Tuikual tlan pelin palina dinhmun an luah thei dawn.

Vikings coach H. Lalhruaitluanga chuan, "Chak tumin theihtawp kan chhuah dawn, inelna hi a tawp hma chuan tha kan thlah dawn lo. Play in boruak kan la sawi ri ngam lo, mahse kan hmabak apiangah chak tumin kan bei ang," tiin Vanglaini a hrilh.

Tuikual South bakah Vikings hian Mission Veng Hotshots leh Khatla TBL te an la hmachhawn leh dawn, tun dinhmunah chuan an chunga mite vek an ni. Chuvangin fimkhur a ngai khawp ang, hliam vangin Vanchuangpuia chu an chhawr thei dawn lo.