Inter Village Football-ah team ṭha an chak

LBS Suzuki All Mizoram Inter Village Football Tournament 2022-ah inkhelh thiam veng an langsar zel a, nimin inkhelah veng ngaihven hlawh Republic Veng, Bethlehem Vengthlang leh Armed Veng South ten hnehna an chang vek. Aizawl khawpawn aṭanga CYMA Football champion tawh Lengpui chiang takin an chak bawk.

Lengpui Mini Sport Complex-a inkhelah Republic Veng chuan Bukpui VC 11-0 in an hneh a, Mizoram striker Lalhriatpuia chuan hattrick a siam bakah Mizo striker hriat hlawh F. Lalrinpuia (Valpuia) chuan goal hnih a khung bawk a ni.

Aizawl veng lailia awm Zarkawtin Bungṭhuam an ngam lo a, 3-2 in an tlawm. Kum 2011 chhiarpuia a lan danin Bungṭhuamah hian mipui 688 chauh an awm a, mahse, Zarkawt hneh turin an ṭha tawk - Vanbawng chuan 3-0 in Ramthar North an hneh bawk!

Phullen-in Lengpuiah thil mak thlentir an tum a, Bethlehem Vengthlang lakah Lalṭhasanga hmangin goal an khung hmasa. Mahse, Kerala Blasters midfielder K. Lalṭhathanga (Puitea) khelhna BVT an ṭha hret.

Bethlehem Vengthlang tan Lalramzauva chuan si phurh a sut a, Suanngaihmuana'n goal khat khungin, Puitea'n ISL a khelh chhan pholangin goal hnih a khung bawk - Phullen tana Lalngaihsaka goal khung ve leh chu scoreline cheimawina chauh a ni.

Mizo player langsar Lalchhuan-mawia Fanai khelhna Lengpuiin Kawnpui VC III laka hnehna chang turin harsatna an tawk lo a, MFA Ground, Sairangah 3-0 in an chak.Lengpui tan NorthEast United defender Joe Zoherliana chuan goal hmahruai a khung a, Vanlalhruaitluanga leh F. Lalremsanga ten goal khat ve ve an khung bawk.

RG Stadium-ah Armed Veng South-in Mimbung laka hnehna chang turin harsatna an tawk lo a, 11-1 ngawtin hnehna an chang a, Mizoram Police striker Lalnunsanga'n (Tale-a) goal sarih ngawt a khung a, Tale-a hi tun inelnaa goal khung tam ber a ni.