Hyderabad coach bantu Chennaiyin

Zirtawpni zan Indian Super League inkhelah Chennaiyin FC chuan 3-1 in Hyderabad an hneh a, ISL club thar Hyderabad hian a hnu lawkah coach Phil Brown nen an inṭhen thu an puang.

Chennaiyin tan Rafael Crivellaro-a'n goal hmahruai a khung hnuah  Nerijus Valskis chuan goal hnih a khung ve leh a, minute 88-naa Marcelinho goal khungin Hyderabad a chhan thei tawh lo. South Indian club tan Jerry Lalrinzuala leh Lallianzuala Chhangte ten inkhel bul ṭanin Lunglei tlangval Lianzuala hi Emerging Player of the Match atan thlan a ni a, Hyderabad lamah R. Laldanmawia chu bench aṭanga luhtir ni mah se danglamna a thlen thei lo thung. 

Hyderabad coach ban tak Brown hi Derby County leh Hull City pawh lo enkawl tawh a ni a, December  2018 khan Indian football rawn luhchilhin team talbuai Pune City a zawm. Pune City tih tawp a nih hnuah ISL club thar Hyderabad a zawm a, mahse league match 12 an khelh tawhah vawi khat chiah hnehna a la chanpui avangin ban a tawk ta a ni. Inrinni zan khan ISL inkhelah Odisha FC chuan Aridane Santana leh Xisco Hernandez goal khung hmangin Mumbai City chu 2-0 in an hneh a, Jerry Mawihmingthanga chu Emerging Player of the Match atan thlan a ni. 

Odisha winger Jerry hian goal khungna hun duhawm zet a nei a, mahse Mumbai City goalkeeper Amrinder Singh chuan ṭha takin a lo dansak. Rei tak inhliam vanga a chawlh hnuah Lalchhuan-mawia Fanai chuan khelmual a rap ṭan ve leh ta a, dam lam pan mek defender hian minute 83-naah Jerry a thlak. Nilaini zanah ISL hi khelh chhunzawm leh tur a ni dawn chauh a, nizana ATK leh Kerala Blasters inkhel result kan hre hman lo.