Arsenal-ah Jesus a kal dawn

Manchester City striker Gabriel Jesus chuan Arsenal a zawm dawn, pound maktaduai 45 man tur niin season nga daih contract a ziak ang; kar khata a hlawh tur zat tak erawh chiang taka tarlan a la ni lo thung.

Gunners leh Man City ten player chungchangah inremna an nei hmasa, chumi hnuah North London club hian Brazilian forward hi inremna an neihpui leh a ni. Premier League-a tawnhriat nei ṭha an la thei hi vanneihna a ni ang.

Pep Guardiola-a'n Jesus hi tlarhmaah chuan a chhawr kual, a sir tawn tawn bakah a laiah pawh a khel thei. Spanish manager hian a duhkhawp chiah lo, rinrawl ni turin Erling Haaland an lakluh avangin Jesus hi an chhuah phal.

Season hmasa EPL-ah Jesus hian Premier League match 28 a khelh aṭangin goal riat a khung, match ṭhenkhat hi bench aṭanga a luh a nih avangin khelmualah hun a hmang tam tawk lo.

Kum 25 mi hian an ram Brazil tan pawh match 56 a khel tawh, kum tawpa neih tur World Cup-ah pawh an ram aiawhin a inlan phak tura ngaih a ni a, chumi tur erawh chuan league match khelh tam a mamawh ang.

Tun nipui bazar chhungin Arsenal hian player pathum an la fel tawh, Jesus hi an la fel leh a nih chuan a palina a ni ang. Jesus hma hian Marquinhos, Matt Turner leh Fabio Vieira te an lo la tawh bawk a ni.