Beiseina neitu Serena Williams

Wimbledon khelh ṭan a ni a, tun hma lama hlawhtlinna lo chang fo tawhtu Serena Williams chuan kuminah beiseina a nei, season hmasa lama a chet fuh lohna hliah khuh ngei tumin a inlan dawn.

Nikum Wimbledon-ah khan Serena hi hneh nei loin a tla, a match hmasa berah Aliaksandra Sasnovich a ngam lo. Set khatnaah game thum ve ve an la a, hliam vangin a khel chhunzawm thei lo a ni.

Hliam vangin a inkhel thei lo zui ngar ngar a, world ranking-ah pawh 1204-na a ni hman dawrh, kumina inlan tur hian wildcard a mamawh hial a, inelna buatsaihtu lamin duhsak takin wildcard hi an pe.

Kum 40 mi Serena chuan, "Chawlh chu ka la chawl hman lo, rilru leh taksa hrisel taka ka inkhelh theih a pawimawh a, chutihrualin engtiangin nge ka lo kir leh ang tih hi chu ka ngaihtuah thiam phak bik lo.

"Wimbledon hmasa kha chu a harsain a hrehawm, tunah erawh hun rei tak hnuah singles match ka khel ve leh thei tur hi ka lawm. Kar hmasa lama doubles match kan khel khan phurna leh chona nasa tak min siamsak," a ti.

American star Serena hian Grand Slam title 23 a la tawh, champion hnem ber Margaret Court-i (24 titles) nih rual turin vawi khat champion a la mamawh, a kum a tam tawh bakah hliam neuh neuh a neih fo avangin champion hnem ber nih rual hi a harsa tawh mai thei.

Serena-i'n a match hmasa ber atan Harmony Tan a hmachhawn dawn. Zaninah hian champion tura rinkai, world number 1 leh seeded pakhatna ni bawk Iga Swiatek pawh a inlan dawn a, ani hian Jana Fett a hmachhawn thung ang.