Assen tlankawngah Bagnaia a chak

Pathianni zana tlan zawh tak Dutch Grand Prix-ah Francesco Bagnaia a chak ber a, champion lai leh tun season rider championship hmahruai mektu Fabio Quartararo erawh chesualin a tlan tluan ve thei lo thung.

Assen tlankawngah Bagnaia-a'n a tir aṭangin hma a hruai, Ducati rider hnungah hian Marco Bezzecchi thlengin pathumna chu Maverick Vinales a ni thung. Pahnihna leh pathumna hi championhsip table lamah chuan a sang zual 10 zingah an la lang phak rih chuang lo.

Ducati rider Bagnaia chuan, "Intlansiak hnuhnung pahnihah harsa takin result kan nei ṭha lo, tunah chuan ka vannei ve ta. A nihna takah chuan intlansiak a rei duh ngei mai, harsatna kara hnehna chan hi chu a hlu bik ṭhin," a ti.

Italian rider hian rider championship-ah point 106 hmuin palina dinhmun a luah a, champion nomawi beiseina a la nei. Chutihrualin a chung bera awm Quartararo-a'n point 172 a neih tawh avangin kawng erawh a hautak deuh tawh ang.

Vawi nga an tlan kualna lekah Quartararo a chesual, nomawi a inchuh pui Aleix Espargaro nen pahnihna nih an tumna lamah an inti palh. Espargaro hi 15-naah a tlahniam dawrh a, theihtawpin bei let mah se palinaah a lungawi a ṭul.

Quartararo chuan, "Thil ho te ka tisual, keimah chauh ni loin midangin an tuar kha pawi ka ti," a ti a, a elpui Espargaro lakah ngaihdam a dil bawk. Spanish rider Espargaro pawhin Quartararo chu rilru chhia leh mi tih nat luih tum a nih loh thu a sawi ve bawk.

Bike intlansiakna sang ber hi kar khat chhung chu an chawl dawn. July 10, Pathianniah Finland Grand Prix an tlan leh ang.