Chelsea-in Ronaldo lakluh an tum dawn?

Nipui transfer hawn lai a ni a, rin loh leh beisei loh tak tak chanchin hriat tur a awm zel - Chelsea chuan Manchester United legend Cristiano Ronaldo lakluh an tum dawn niin an sawi!

American sumdawng hausa Todd Boehly leh a thawhpui ten Chelsea an lei hnuah club board an inthlak danglam nual tawh a, player chhuak an awm tawh bawk.

Mahse, Boehly leh a ṭhianten player lakluh sawi tur an la nei lo a, fans ho an mangang ru tawh hle. Mahse, tun hnaiah Chelsea-in thawm an nei ve leh ta a, Cristiano Ronaldo an dawr thu a ni!

Chelsea hian Manchester City forward tlatlum lo Raheem Sterling chu lakluh tumin an hel nia sawi a ni bawk a, mahse, he thu buatsaih thleng hian thuchiang a la awm lo.

An be ngei e
Roman Abramovich-a'n Chelsea neitu nihna dinhmun a luah lai kha chuan transfer bazar-ah Chelsea fans an hlauthawng ngai lo - an duh chu eng anga to pawh ni se an lei mai a, hlawh lamah lah mi pek ngam loh an pe ngam zel a, an chhe tak tak thei lo.

Mahse, Russia-in Ukraine a run tuarin, Abramovich-a'n loh theih lohin a club a hralh a, Boehly leh a ṭhiante thlazar hnuaiah Chelsea-in player an la lalut hleithei lo a, kum 19 zet Blues-a transfer lam buaipuitu Marina Granovskaia a bang tawh bawk!

Heng zawng zawng ngaihtuah hian Chelsea fan-te an hlauthawng ru hi a awm thlap. Mahse, rin loh lamah Blues-in thawm an nei a, United duhlai Ronaldo lakluh theih an inbeisei.

Chelsea neitu thar Boehly chuan kar hmasa khan Portugal-ah football agent lar Jorge Mendes chu inbiakna a neihpui a, ani hi Ronaldo agent a ni - he inbiaknaah hian Ronaldo chungchang an sawi lang.

Ronaldo dinhmun
Kum 37 mi a ni tawh a, Ronaldo lakluh hi Chelsea tan 'season khat buaina' chinfel theihna tawk chauh a ni dawn - chutihrual chuan a theihnaah rinhlelh tur a awm lo a, a kum tam anga teh chi a ni lo.

Ronaldo hian season hmasa ṭan dawna United a pan khan kum hnih chhung atan contract a ziak a, thla 12 dang cham turin contract a la nei tihna a ni.

Portuguese forward hian season hman zawh takah khan inelna hrang hrangah match 38 khelin goal 24 a khung a, United tana goal khung hnem ber ni chungin season a khar.

Chelsea hian season hmasa ṭan dawna man to taka an lakluh, pound maktaduai 97.5 man Romelu Lukaku chu Inter Milan-ah loan-in an kir tir dawn nia sawi a ni a, Italian media-te chuan Nilaini hian Lukaku hian medical a nei dawn niin an sawi hial - Lukaku thlak tur Chelsea-in an mamawh.

Mahse maw...
Boehly leh Ronaldo agent Jorge Mendes-ten Ronaldo chungchang an sawi dun ngei a, mahse, Portuguese forward hian Stamford Bridge-a pan ngei ngei dawn tihna erawh a ni lo.

United manager thar Erik ten Hag chuan Ronaldo hi Old Trafford-a cham turin a duh nia sawi a ni a, Real Madrid forward hlui Ronaldo pawhin Ten Hag hnuaia khelh a hreh lo.

Ronaldo hian, "He hmunah hian ka hlim ṭhin a, tunah pawh ka hlim em em. Ten Hag hian Ajax tan hna ropui tak a thawk tih ka hria a, tawnhriat pawh a nei ṭha. Mahse, a duh anga thil thlak danglam tur chuan hun kan pek a ngai a ni.

"Kan hlawhtlin ka ring a, ka duhsakna ka hlan. Kan hlimin kan phur em em a, season tharah nomawi kan chawi beisei tlat ang u - United hi a awmna ṭhinah a kir leh ka ring tlat a, hun duh deuh ṭhin mah se beiseina ka nei tlat a ni," a ti.

Tak tak maw?
Cristiano ṭawngkam lo neih tawh aṭanga thlirin United-ah a cham a rinawm a, mahse, a thusawi zawng zawng hi Boehly leh a agent te inhmuh hmaa a sawi tawh a ni tih hriat a ṭha.

Champions League player ropui bera chhal ngam hian United-a cham a thlang a nih chuan season tharah Europa League a khelh a ṭul dawn tihna a ni a, Ronaldo nen a inhmeh lo - European football inelna sang ber inlan a châk ang.

Chu chauh a ni lo - Ronaldo hian United chu squad tichak turin a duh nia sawi a ni a, mahse, Red Devils hian Paul Pogba, Jesse Lingard, Juan Mata leh Nemanja Matic te ho an chhuahtir hnuah player lakluh an la nei lo.

United hian Barcelona midfielder Frenkie de Jong leh Brentford-a contract hmang zo hlim midfielder Christian Eriksen te an dawr mek a, mahse, he thu buatsaih lai hian inremna an neihpui thu hriat a la ni lo - Ronaldo hi Bayern Munich-in an dawr bawk tih hriat tel a ṭha.

Blues an kiam zel
Chelsea-in Ronaldo an rim thu a rik laiin administration lam pawh an insingsa fel zel a, club technical and performance adviser Petr Cech chuan Blues a chhuahsan dawn.

Kum 2019-a adviser tura Chelsea-a kir Cech chuan, "Kum thum chhung Chelsea-a he hna ka thawk thei kha ka lawm takzet a, club-in neitu thar a neih avangin ka tan chuan inthiarfihlim hun ṭha tak niin ka hria a ni," a ti.

Arsenal aṭanga a professional career mangṭhatu Cech hian Chelsea-ah hian kum 11 chhung player a nihna angin hun a hmang a, nomawi 13 a chawipui zingah Premier League (4) leh Champions League a tel.

Cech hma hian Chelsea chairman Bruce Buck chuan June 30-a a hna chawlhsan turin thutlukna a lo siam tawh a, kar hmsa khan sporting director Granovskaia chuan Blues a chhuahsan thu puan a ni bawk.