Milan bul ṭanna tur Udinese

Serie A season thara an khelh dan tur tihchhuah a ni a, champion lai AC Milan chuan an match hmasa ber atan San Siro-ah Udinese an mikhual dawn, point thum nena season bul ṭan theihna tur a ni ang.

Milan hian kum 11 hnua a vawi khat nan Serie A nomawi an chawi. Italian champion an nih aṭanga ni 83 hnuah season thar an ṭan leh dawn. August 13 aṭangin Serie A season thar hi bul ṭan tur a ni.

Inter Milan chuan kai thar Lecce an tlawh dawn. Allianz Stadium-ah Juventus hmachhawn turin Sassuolo an lenglut dawn a, team ṭha Napoli chuan Hellas Verona an lenchilh ve thung ang.

Season dang ang lo takin kuminah hian thlasik laiin World Cup an khel dawn. Hei vang hian thlasik chawlh a rei dawn - November 13 aṭanga January 4 thleng an chawl dawn, nakkum June thla tirah season an khar fel chauh ang.

Inkhel ngaihven hlawh ni ṭhin 'Milan Derby' hmasa zawk chu September 4-ah khelh tur niin, nakkum February thlatir lamah Milan club pahnih an inhmachhawn leh bawk dawn a ni.