West Ham-in Lingard an hel

Premier League club West Ham chuan Manchester United midfielder kal chhuak Jesse Lingard chu an club-a kir turin an sawm a, season tharah Hammers jersey nen kan hmu lo ang, tih a sawi theih loh.

Kum 29 mi midfielder hian July 1-ah United-a a contract a hmang zo tawh dawn a, Red Devils chuan a duh lam club pan turin zalenna an pe.

Lingard hian 2020-21 season tawp lam khan Hammers tan loan-in a lo khel tawh a, match 16-a khelhsakah goal kua khungin assist vawi nga a nei thei a ni.

January khan Hammers hian London Stadium-a loan-a khel turin sawm leh mah se, United lamin European football khel tura an elpui team lakah an player kal an phal lo.

United academy chhuak Lingard hian Red Devils tan inelna hrang hrangah match 232 khelin goal 35 a khung a, assist vawi 21 a nei a, FA Cup, League Cup, FA Community Shield leh Europa League-ah te champion nomawi a chawi.

Hetihlai hian Hammers hian Paris St-Germain goalkeeper Alphonse Areola chu an lalut dawn bawk a, season hmasaa loan-a an lakluh keeper hi £10.5mtd-in a nghetin an lei thei dawn - he thuziak i chhiar meuh chuan an inlalut fel tawh hial mai thei.

Kum 29 mi Areola hian Premier League-ah Hammers first choice keeper Lucasz Fabianski a tluk lo a, mahse, cup inelna lamah inlanin Europa League semifinal an luh theih nan player pawimawh a tling.

Season thara Europa Conference League playoff aṭanga European football zinkawng ṭan tur Hammers hian pre-season training an nei ṭan leh tawh a, Thawhṭanni khan Scotland-a pre-season training camp nei turin an zin chhuak.