Hualngohmun, Kolasib Jt VC, Keifang leh Zokhawthar inlan dawn

LBS Suzuki All Mizoram Inter Village Football Tournament 2022 chu vawiin hian khelh chhunzawm a ni dawn. Aizawl khawpui pawn aṭangin team ṭha an awm nual, chung zinga mi - Hualngohmun, Kolasib Jt VC, Diakkawn, Keifang Jt. VC leh Zokhawthar te vawiinah an inlan dawn.

Zokhawthar hi football huangah an hming a langsar ngai lem lo. Mahse, Champhai DFA buatsaih Upa C. Keikhuma Memorial Inter Village Football Tournament-ah final an lut thei, final-ah Melbuk hneh lo mah se tun hnaiah an indinthar ṭha hle; Aibawk VC nen an inhmachhawn ang.

Kolasib khawpui chhungah chuan Diakkawn hi team ṭha an ni ṭhin, tunah Joint VC hmingin an inlan a, khawchhak lam khua Farkawn nen an inhmachhawn dawn. Farkawn hian Mizoram huap pawha hming langsar an lo nei tawh ṭhin, zuamsual theih tur an ni ve tho.

Hualngohmun hi tual-chhung football ngainatuteah chuan an mikhual lo, team ṭha tak tak an rawn chhawp chhuak tawh ṭhin. Tun ṭumah pawh hian Mizoram huapa hming lang phak Vanlalthanga leh Lalhmunmawia te an la kawl - Lungtan tan chuan an la u deuh hretin a rinawm.

Keifang sawi hmaih a thiang lo, inbuatsaihna an neih ṭhat avangin Aizawl khawpui team an hlau lo ang. Khatla East lakah rinkai zawk an ni hial mai thei, an chak a nih chuan champion tura rinkai Armed Veng an hmachhawn leh ang.

Mizoram pum huap inelna a ni a, khelmual chhung mai bakah a pawn lam thlengin chanchin ngaihnawm tak tak a awm fo. Football hmangin Mizo kan nihna a lang chhuak zel a, infiamna bakah zonunmawi chawi tharin a awm zel a ni.