Red Army boruak a lian

Aizawl FC ṭantu ruh­kawl Red Army-in AFC leh Mohun Bagan inkhel tur atan inpuahchahna an nei ṭha a, entu zawng zawng tan a thlawna sem turin flag sen an siam a, banner ṭha­hnem tak an siam bawk.

Ningaini tlai khan RG Stadium-ah Red Army te hi an hnatlang a, tlai lamah Mohun Bagan practice tur nen intawng fuhin Aizawl FC hla pui an sak khum a, boruak a nung nghal hle. Kolkata aṭanga rawn kal journalist 10 bawr velin Mizo supporter chetdan chu hmunnawm an ti a, en nuam an tiin an ngaihven em em bawk.

Bagan practice laia Red Army chet dan aṭang­in Inrinni inkhel boruak a nung dawn tih a hriat theih nghal a, ticket a zawh hma avangin stadium khat mipui an pungkhawm dawn a, kawr sen an hak vek chuan inkhel ropuina belhchahin a awm ang.

Mariners-in Aizawl FC khelmualah ṭantu an nei dawn a, phai lam thuthar thehdarhtute sawi zat erawh a inang lo. Bagan supporter 100 chuang an rawn kal pawhin a mak lo ang.