Mualpuiah Jeje a inlan dawn

Mohun Bagan coach Sanjoy Sen chuan vawiina Aizawl FC nen an inhmachhawn hunah a striker chhuanvawr Jeje Lalpekhlua a inlan ngei tur thu a sawi. Kum 56-a upa coach chuan, "Jeje hian RG Stadium-ah Aizawl FC a hmachhawn ngei dawn a, inkhel bul a ṭan dawn leh dawn loh erawh ka sawi thei lo thung," a ti.

Mizo tlangval Jeje-a'n Aizawl FC a hmachhawn tawh vawi hnihah goal thum a khung a, Mizo club a ngam ṭhin hle. Vawiina an inkhel tur erawh Aizawl khawpui ngeia Jeje-a'n I League match a khelh hmasak ber tur a ni a, Hnahthial tlangval hi a phur tawh hle.

AIFF player of the year nilai Jeje-a chuan, "Kan ram ngeia I League match kan khel tur hi ka phur takzet a, ka hlim em em a ni," a ti a, goal khung ta se a lawm dawn leh dawn loh chungchanga Vanglaini palai zawhna erawh, "Ka hrethiam bik lo a, ka sawi thei rih lo," tiin a chhang.