Pathianni zanah Liverpool inlan dawn

Champions League khelh tum Liverpool-in Premier League-ah match nga khelh tur an la nei a, Pathianni zan dar 9:00-ah Crystal Palace an mikhual dawn - Jurgen Klopp-a nauten a sang pali zingah tel ngei an duh a nih chuan tawlthluk a thiang tawh lo a, tun hnaia Chelsea leh Arsenal hneh thei Palace lakah fimkhur a ṭul ang.

Klopp a fimkhur

Liverpool boss Klopp-a'n Palace a hrechiang a, fimkhur taka an khelh tur thu a sawi. German coach chuan, "Crystal Palace hi team ṭha tak an ni a, an attacking a na em em bawk. An players neih Wilfried Zaha, Andros Townsend, Christian leh Jason Puncheon-te hi en ula, team chhia an ni thei lo," a ti.

Klopp chuan season ṭan dawna Palace lama a kaltir, a striker hlui Christian Benteke fak nghalin, "Ball kangah Christian hi a hlauhawm em em a, tun season-ah goal 14 a khung tawh avangin inrintawkna nen Anfield a rawn pan dawn a ni," tiin fimkhur a ṭul thu a sawi.

Damdawi In lun

Reds-in hliam vangin season tawp thleng Sadio Mane an chhawr thei dawn lo chiang tawh a, Adam Lallana, Jordan Henderson leh Danny Ings te chu tun dinhmuna la inhliam mek an ni bawk.

Klopp chuan a player inhliamte chungchang sawiin, "Adam hi karleh lamah chuan full training a zawm theih tawh kan beisei a, Ings hi a khup hliam hnuah a tlan thei leh ṭan tawh a, Jordan erawh a dinhmun a la chiang lo. Amah hi dam ṭha tak angin lang mah se a la inkhel thei tlat lo a ni," tiin a captain dinhmun a sawi.

Reds player zingah Joel Matip, Lucas Leiva leh Ragnar Klavan-ten hliam tenau an nei vek bawk a, an dinhmun a la chiang lo.

No = Hart

Tun hnaiah Torino-a loan-a khel mek Manchester City goalkeeper Joe Hart chu Liverpool-in lakluh an tum nia sawi a ni a, Reds hian English keeper manah pound maktaduai 20 sen an inhuam ni hiala tarlan a ni.

Mahse, Liverpool boss Klopp chuan, "Hart hi keeper ṭha tak a ni a, mahse tunah emaw nakin hun atan pawh kan mamawh rih lo," tiin lakluh tumna a neih loh thu a sawi a, a keeper pahnih Simon Mignolet leh Loris Karius a la ring tawk.

Koeman leh Lukaku

Zanin dar 7:30-ah Everton-in West Ham an lenchilh dawn a, Ronald Koeman-a naute hi season thara Europa League khel thei dinhmuna an din mek avangin zanin inkhel tur hi a pawimawh hle. Mahse, press conference-a Koeman-a zawhna dawn tam zawk chu an inkhel tur niloin Romelu Lukaku hmalam hun a ni.

Dutch manager chuan league match 32-a a khelha goal 24 khung tawh striker chungchang sawiin, "Lukaku hian he club-ah hian kum hnih contract a la nei a, miin an duh a nih chuan min dawr thei ang. Mahse, kan tih tur erawh a cham zel theih nana theihtawp chhuah a ni," tiin chelh a tum hle.