El Clasico hun a thleng ta
"Kan chance neih hnuhnung ber a ni tawh a, hnehna kan chan ngei a ngai," tih chu Andres Iniesta ṭawngkam a ni a, hei hian Pathianni zan dar 12:15-a La Liga El Clasico pawimawh zia a hrilhfiah chiang hle - Real Madrid khelmualah Barcelona an leng dawn.
Real Madrid-in match khata khel tlem zawk chungin La Liga table-ah hma an hruai mek a, Catalan club hian hnehna an chang zo lo a nih chuan point rukin Real an thlahfal dawn tihna a ni - Barca tan chak ngei a ngai.
Barcelona-in Juventus an ngam loh avangin Champions League-ah beisei an nei tawh lo a, Real erawh Bayern Munich hnehin semifinal an lut thung. Barca ang club tan Champions League leh league nomawi chawi lo chunga season mangṭha a mawi lo a, season tawpa chhuak tur manager Luis Enrique-a tan mualphona a ni ang.
Neymar tel lohna
Real Madrid tana thu hriat nuam tak tur chu Barcelona-in an player pawimawh Neymar chu hrem vangin an chhawr thei dawn lo. Brazil captain hi Malaga laka an tlawm ṭuma ngeiawm taka fourth official kut a ben khum avangin match li khel thei lo tura hrem a ni a, Catalan club lamin hrem a nihna hi ngaihtuah nawn turin thlen mah se pawm a ni lo.
Hetihlai hian Barcelona midfielder Ivan Rakitic chuan an player pawimawh Neymar tel lo pawhin hnehna an chan theih thu a sawi a, "Player pawimawh a nihzia hi sawi nawn ngai a ni lo. Mahse, Neymar tel lo pawhin hnehna kan chang thei tih hi kan pholang fo tawh a ni. Inrintawkna nasa tak nen Santiago Bernabeu hi kan pan dawn a, Neymar tan hnehna chan kan duh a ni," a ti.
Messi vs Ronaldo
Lionel Messi-a'n tun season-ah goal 45 a khung tling leh der tawh a, Cristiano Ronaldo-a'n goal 31 a khung thung. El Clasico-a goal khung hnem ber chu Messi niin goal 21 a khung tawh a, heng zinga goal 10 hi league-a an intum hnuhnung 16-a a khung a ni a, league match 16-ah hian Ronaldo chuan goal riat a khung ve bawk - zaninah player pahnih hian en bik an hlawh leh ang.
La Liga-a El Clasico hnuhnung 16-ah chawhrualin match khatah goal 3.6 zel lut ang a ni a, zaninah pawh goal a tam leh dawn tih a chiang - Barca-in Neymar chhawr thei dawn lo mah se Luis Suarez an la nei a, Real-in Bayern lakah Gareth Bale chhawr thei lo mah se Welsh winger hian training a zawm leh tawh bawk.