FA Cup semifinal Chelsea hmachhawn tur Spurs
Zanin dar 9:45-ah Chelsea leh Tottenham Hotspur ten Wembley Stadium-ah FA Cup semifinal hmasa zawk an khel dawn. Pathianni zan dar 7:30-ah Arsenal leh Manchester City ten final luh an inchuh bawk ang.
Chelsea hi Premier League hmahruaitu an ni a, an khingpui tur hi league lamah pawh anmahni hnaih bertu an ni; an inkarah point li chiah a awm - inkhel result hian club pahnihah nghawng a nei lian thei. Season thara Champions League khelh tuma inum ve mek City leh Gunners te hian Cup inelna lamah pawh chak lo zawk nih an duh dawn lo.
Team ṭha pahnih
Ningani khan PFA Premier League Team of the Year puan a ni. Chelsea hian Eden Hazard, N'Golo Kante, Gary Cahill leh David Luiz te an thawh a, Spurs aṭangin player pali tho Harry Kane, Danny Rose, Kyle Walker leh Dele Alli te hming a lang ve bawk - EPL season kal laia team
ṭha pahnih an ni tih a ti chiang hle.
Chelsea hian FA Cup semifinal vawi 22 an khelhna tur a ni a, tun hma lama vawi 21 an khelh tawhah ṭum 11 chu a chak zawkah an ṭang, kum 2012 khan Spurs hi 5-1 a sawpin final an lut.
Tun ṭuma an inkhelhna tur hi Wembley a nih avangin Blues hian inrintawkna an nei dawn. Kum 2007-a Wembley sak ṭhat a nih hnuah Blues hian match 14 khel tawhin vawi kua hnehna an chang a, vawi nga an chak lo - Roman Abramovich-a'n kum 2003-a club a lei aṭanga an match 800-naah hian chak ngei an duh dawn.
Antonio Conte-a naute hian tun hnaiah chet sual zeuh an ching. Crystal Palace an hneh loh hnuah Man City leh Bournemouth te hneh mah se an match hnuhnung berah Manchester United 2-0 in an hneh lo, chesual thei an ni tih a chiang. Gary Cahill, Diego Costa, Victor Moses, Marcos Alonso leh Thibaut Courtois te dinhmun a chiang lo vek.
Tottenham lamah Danny Rose, Erik Lamela leh Harry Winks te hliam vangin an chawl ve bawk. Striker rinrawl Kane a lo kir leh tawh a, England intenational hian Bournemouth an sawp ṭumin goal a khung leh nghal - hliam vanga tlarhnung leh keeper lama buaina nei Blues tan mangchhia a ni thei ang.
Spurs manager Mauricio Pochettino chuan, "Rinkai an awm a nih chuan Chelsea an ni ang. Player leh manager kan en pawhin tawnhriat nei ṭha leh hlawhtling tawh tak tak an ni. Mahse, tun dinhmunah chuan keini pawh hi nomawi duha tuihal mek kan ni a, inrintawkna kan nei bawk. England-a team ṭha ber hmachhawn turin kan inpeih," a ti.
Wenger leh Pep tan
Premier League manager zinga mahni dinhmun ngai chelh rei ber nilai Arsene Wenger-a'n season tawp thleng bak contract a nei tawh lo a, a la pawt sei lo bawk. Gunners hi kuminah an talbuai hle, league-ah parukna an ni a, Champions League aṭangin mualpho takin an tla tawh bawk - an beisei neihchhun chu FA Cup hi a ni.
Champions League nomawi duh vangin Man City-in Pep Guardiola an lalut, Spanish manager kaihhruaina hnuaiah last 16 an paltlang zo lo. Barcelona manager hlui hian a naute chu league-ah palina a nihpui mek - Arsenal ang thoin tun season-a an beisei awmchhun chu khawvela knockout tournament upa ber chiah hi a ni tawh.
Team pahnihte hi thlatir lam khan Emirates Stadium-ah league match khelin an lo intawng tawh, Leroy Sane leh Sergio Aguero te goal khung chu Theo Walcott leh Shkodran Mustafi ten sutin 2-2 in an inhnehtawk. Manager ropui pahnihte hian season duhawm loh an hman hliah khuh nan FA Cup nomawi chawi an duh avangin inkhel hmuhnawm beisei a sual lo ang.