Man United damna Marcus Rashford
Extra time-a Marcus Rashford goal khung hmangin Manchester United chuan an mikhual Anderlecht 2-1 in an hneh a, inkhel pahnih belhkhawmah 3-2 a hnehna changin Jose Mourinho nauten Europa League semifinal an lut. Ningani zan inkhel dangah Lyon, Ajax leh Celta Vigo ten quarterfinal an paltlang ve bawk.
A pawimawh
United manager Mourinho-a'n Premier League aṭang aiin Europa nomawi chawi chunga Champions League khelh a awlsam zawk tur thu a sawi tawh. Chelsea an hmachawn ṭuma hahchawlhtir Zlatan Ibrahimovic chu inkhel bul ṭantir a ni.
Old Trafford-a inkhelah Blues laka goal khungtu Rashford chu player langsar a ni. England international hian Henrikh Mkhitaryan goal khung tur a siamsak. Armenian midfielder hian Europa League match a khelh hnuhnung parukah goal nga a khung ta.
Belgian club-in counter attack aṭangin United tlarhung su nghing zeuh zeuh mah se an mamawh chhanna an hmu thei lo. Minute 32-naah captain Sofiane Hanni chuan hnai set sawt aṭangin an siphurh a sut hlauh. Untied tan khawvela player manto ber Paul Pogba chuan goal khung tura a hun ṭha neih ṭum hnih a chhawr
ṭangkai thei lo.
Hun pangngaiah goal dang a luh tawh loh avangin extra time khelh a ngai. Minute 107-naah Rashford a inlar. Kum 19-a upa Rashford hian Marouane Fellaini hnen aṭanga a ball hmuh chu defender pahnih a bum hnuah tawih zetin a khung.
Ibra a hliam
Anderlecht an hneh ṭum hian United striker Ibrahimovic leh defender Marcos Rojo te chu khup hliam vangin lakchhuah an ni a, he thu buatsaih lai hian an chawlh chen tur hriat a la ni lo.
Kum 35-a upa Ibrahimovic hi minute 90-naah lakchhuah niin, Rojo erawh khelmualah minute 23 bak a inlan hman lo. United hian Premier League khel turin Pathianni zan dar 6:45-ah Burnley an lenchilh dawn a, an player pawimawh pahnih hi an dinhmun a chiang lo hle.
United manager Mourinho chuan, "Chiang takin ka sawi thei rih lo, mahse a nihna taka chuan an pahnih hian an dinhmun a ṭha lo tih chu ka chiang thung a ni," tiin a sawi.
Paris St-Germain aṭanga United zawmtu Ibra hian inelna hrang hrangah goal 28 a khung tawh a, a hmun ruak luahkhah a harsa ang. Tlarhnungah Chris Smalling leh Phil Jones te hliam vanga an chawlh mek bawk avangin Rojo inhliam pawh hi chanchin ngaihthlak nuam lo tak a ni ngei ang.
Inkhel dang
Celta Vigo-in UEFA competition-a semifinal an luhna hmasa ber tawng turin Genk an hneh. La Liga club hian 3-2 a an hneh tawh Genk hi khualmualah 1-1 in an va inhnehtawkpui a, inkhel pahnih belhkhawmah 4-3 in an tlang.
European champion vawi li ni tawh Ajax-in first leg-a an goal hnih neih sa an hum zo lo a, second leg-ah goal hnih an chhuah avangin Schalke nen 2-2 chiah a ni. Extra time-ah minute 120-naah forward Amin Younes chuan Dutch club tan chakna goal a khung.
French Ligue 1 club Lyon chuan an khelmuala 2-1 a n hneh tawh Besiktas chu Turkey-ah 2-1 vekin an va hneh lo ve thung. Penalty shootout hmanga chak zawk zawn a nih hnuah Lyon hi 7-6 in an chak.