Cavs tan match khat chiah ngai tawh
Cleveland Cavaliers tan NBA Playoffs first round paltlang turin match khat bak chak a ngai tawh lo. Nimin zing inkhelah Cleveland hian Indiana Pacers 119-114 in an hneh. Pathianni zan dar 10:30-ah Game 4 an khel ang.
Bankers Life Fieldhouse-a inkhelah Indiana Pacers lamin bul an ṭan ṭha zawk a, halftime-ah point 74 an score hman - Cavs lamin point 49 bak an nei hman lo, an inthlauhna chu point 25 zet a ni.
Mahse, Cavs hian quarter hnuhnung pahnihah champion zia chhuahin point 70 ngawt an score belh a, Pacers lamin point 30 bak an neih belh theih loh avangin Cavs an chak daih.
NBA champion Cavs tan LeBron James chuan point 42 a score bakah rebound vawi 13 a nei a, assists vawi 12 a nei bawk. Season hmasa NBA Finals MVP James hian playoffs-ah triple double vawi 17 a neihna chiah a ni.
Cavs coach Tyronn Lue chuan, "LeBron James chu inkhel harsat lai apiangin buaina chingfeltu a ni ṭhin. Ani hi chuan a theihna zawng zawngin a bei ṭhin a, hnehna kan chan hma chuan a tha a thlah ve ngai lo. Kan mamawh chhan chu James hi a ni," tiin season hmasa a champion puitu chu a dahsang hle.