India ramah Aizawl a sang ber! Mizo mipui leh AFC-in Mohun Bagan an hneh

RG Stadium, Mualpuiah Aizawl FC-in kum 127-a upa Kolkata club Mohun Bagan chu Mizo tlangval Zohmingliana Ralte goal khung hmangin 1-0 in an hneh a, Mizo club-in I League nomawi chawi turin point khat bak an mamawh tawh lo.

Inrinniah nasa takin ruah a sur a, inkhel enna khua ni lo mah se Mizo mipuiin Mizo club tan tiin RG Stadium pan an ṭhulh phah lo.

Entu pungkhawm zat hi 'official' chuan mi 11,233 niin an puang a, amaherawhchu a hmuna entute chuan hei aia tam an pungkhawm tih an hria. Mipui hi mumang ram a tak ram hnaihtirtu an ni a, Zotea goal chu sawifiah thiam loh khawpa mipui tana lawmna thlentirtu an ni.

A tir aṭangin Jeje
Nilaini zan AFC Cup-a Mohun Bagan-in Maziya an hmachhawn ṭumin Jeje Lalpekhlua awltir a nih ve loh avangin bul a ṭan a rinawm loh a, amaherawhchu coach Sanjoy Sen-a'n inkhelh ṭan hmain Mizo chhuanvawr Jeje Lalpekhlua chu khelhna hmun a pek tur thu a sawi ang chiahin Hnahthial tlangval hi inkhel bul ṭantir a ni.

Bagan hian ṭan phat aṭangin sa huai an ser nghal a, Jeje bakah Sony Norde, Darryl Duffy leh Katsumi Yusa ten inkhel bul an ṭan vek. Aizawl FC coach Khalid Jamil erawhin Churchill Brothers an hneh ṭuma bul ṭantute bawk bul a ṭan nawn tir thung.

Chhandamtu hmasa Albino
Mohun Bagan-in bul an ṭan fuh zawk a, minute thumna lekah vei lam aṭanga Haitian forward Norde ball fing tak chu Duffy-a'n um lutin goal ngeina tura ngaih a ni a, keeper Albino Gomes chiah a hmachhawn tawh.

Swansea forward hlui Duffy-a'n goal zawnah pet mah se Aizawl FC keeper Albino-a'n a dang hman tlat. First half-ah ruahsur vangin player-ten an duh angin ball an kalpui thei lo a, chhum zin vangin inkhelh chawlh a ngai hial a, goal hmuh tur a awm lo bawk.

Nawr a hun - Khalid
Aizawl FC leh Mohun Bagan an inhnehtawk a nih chuan I League nomawi chawi turin Kolkata club dinhmun a ṭha zawk dawn.

AFC boss Khalid Jamil chuan, "Darkar khat hnuah chuan defensive game an khelh a ngai tawh dawn a, chuvangin theihtawp chhuahin ka naute ka hrilh a, sawi ang takin an theihna zawng zawng an chhuah a ni," tiin inkhelh banah halftime laia a naute a fuih dan a sawi chhuak.

Zoram tan Zoa
Aizawl FC player-ten an pu fuihna khelmual chhungah an chhâng a, second half ṭan tirh aṭanga chungnung zawk chu Mizo club an ni tawh.

Mahmoud Al Amna chu Aizawl FC goal nawr bul ṭantu a ni ṭhin a, Syrian midfielder leh a kawppui Jayesh Rane te chu Bagan player-te tan buaipui tham an ni.

Minute 57-naah Brandon VL Remdika cross chu Amna-a'n Mizo tlangval R. Laldanmawia tan a siamsak a, Sialhawk tlangval goal khung tur hi Bagan defender Anas Edathodika-a'n a dang hman.

Mizo club-in inkhel an thunun chhunzawm a, box pawn aṭanga Amna ball pet kawh ṭha tak chuan Mariners defender Eduardo Soares kut a fuh niin lang mah se referee-in Mizo club beisei penalty a pe lo.

Minute 83-naah Amna-a'n Bagan defender a bum hnua a corner hlawhchhuah chu pet nghalin Zotea'n chiang zetin a tauh goal a, Ramhlun South tlangval goal khung hi inkhela goal awm chhun a ni.

Tlarhnung phui
Aizawl FC chak nana Zotea goal a tawk theih nan tlarhnung player-te an khel ṭha.

I League player hlauhawm bera sawi Sony Norde chu Ashutosh Mehta-a'n a dah ṭha a, AFC captain Alfred Kemah Jaryan thawhrimna zarah Bagan midfield laia awm Japanese midfielder Katsumi-a'n ṭum dang a pha lo.

India national team striker Jeje leh Duffy ten AFC defender Zotea leh Eze Kingsley te inkawp an su tlang thei lo a, Mizo tlangval thlaktu Balwant Singh pawh eng ruai a ni lo.

Armed Veng tlangval Lalramchullova-a'n Kolkata Derby-a goal ropui khungtu Azharuddin Mallick a dah ṭha a, tha thar nena rawn lut Prabir Das dan kawngah erawh harsatna a tawk thung.

Tun season-ah Mizo club-in RG Stadium-ah match kua khelin vawi riat hnehna an chang a, match rukah goal an chhuah lo.

Aizawl FC hian April 30-a Shillong Lajong an tlawh hunah goal an chhuah lo a nih chuan NorthEast club zinga I League champion hmasa ber an ni ang.

Mizo mipui aṭangin 100% puihna kan hmu - Khalid
Ruahsur hnuaiah Ai­zawl FC-in ṭantu an nei ṭha a, April 22 kha RG Stadium, Mualpuia mipui pun­khawm tam ber ṭum a ni. Aizawl FC coach Khalid Jamil chuan, "Mizo mipui aṭangin 100% chu ka hmu chiang a, amaherawhchu stadium kil te reuhte aṭang kha chuan 100% ka hmu lo. Pawi erawh ka ti lo - kha laia ṭhute kha Mohun Bagan supporter te an ni," tiin inkhel entute chunga lawmthu sawi pahin fiamthu a thawh.

Mizo mipui hi Mo­hun Ba­gan coach San­joy Sen pawhin a fak a, Mariners coach chuan, "Hetiang ang renga entu mipui ṭha hi khualmuala kan inkhelh tawhnaah kan la hmu lo a, hei hi India ram football tan pawh a
ṭha a ni. Mizo mipuite an club ṭan tura an au kha an tih tur a ni a, an chetdanah sawisel tur kan nei lo a, kan dah sang em em a ni," tiin Vanglaini palai a hrilh.

Mumbai FC coach hlui Khalid hian Mohun Bagan an hneh hma zawngin champion chung­chang a sawi ngai lo a, Inrinni tlaiah erawh champion a inbeisei thu a sawi ve ta. Khalid chuan, "Club president-in champion chung­chang a sawi pawhin 'sawi a la hun lo' tiin ka sawi ṭhin a, tunah erawh kan champion theih thu hi kan sawi thei tawh ang. Amaherawhchu kan match hnuhnung ber hi a pawimawh a, ṭha taka kan khelh a ṭul dawn a ni," tiin a sawi.

Aizawl FC coach Khalid-a piancham hi April 21 a ni a, inkhelh banah player-te khelh danah a lungawi thu a sawi rualin result hmangin piancham lawmpuina pek a nih thu a sawi.