A la tawp lo - Bagan coach

Aizawl FC-in champion turin goal hnih an mamawh a, injury time-ah goal hnih khung theihna hun ṭha nei mah se an hmang ṭangkai lo. April 30 zana I League khelh zawh hunah champion tur a chiang chauh ang.

Mohun Bagan coach Sanjoy Sen chuan, "Champion turin beiseina kan la nei. Kan tih tur chu kan match hnuhnung bera Chennai City hneh a ni. Season liam ta kha chuan kan champion thei dawn lo tih kan hriat aṭangin Federation Cup-ah rilru kan pe a, kan champion phah reng a ni. Kuminah erawh kan la champion thei a, I League-ah chauh rilru kan pe ang," tiin an la champion theih thu a sawi.

Inkhel chungchang sawiin Sanjoy chuan, "Ruahsur leh chhum zing chungchangah chhuanlam siamna tur a awm lo a, Aizawl FC tan pawh a danglam bik chuang lo. Team ṭha zawk chak loh chang a awm a, kan hun a ni lo a ni. Kan khel ṭha zawk a, amaherawhchu vanneihna hian result-ah nghawng a neih avangin kan chanah kan lungawi a ṭul a ni," tiin chhuanlam a siam lo.

Kolkata lam journalist-in Jeje Lalpekhlua'n a theihna angin a khel tawk loah a ngai a, amaherawhchu Sanjoy-a'n Mizo tlangval hi a chhan.

Bagan boss chuan, "Striker hi chuan goal an khung phawt chuan engtin pawhin khel se a pawi lo. Tun ṭum erawh Jeje-a hian goal a khung lo a, amaherawhchu chak tumin theihtawp a chhuah. Jeje-a kha penalty hlawh thei tur a ni a, mah se pek a ni lo. Theihtawp kan chhuah vek a, vanneihna kan keng tel lo," tiin Jeje-a sawiselna a pawm lo.