Zarkawt BCA an chak vek
Mizoram Super League season thumna khelh mekah Zarkawt BCA chuan league round-a match nga an khelhah hnehna an chang fai vek. Zirtawpni zan Zarkawr derby-ah BCA hian Zarkawt Serpents 85-69 in an hneh.
Hawla Indoor Stadium-a inkhelah BCA hian state pawn player Amritpal leh Yadwinder Singh te chhawr thei lo mah se tualchhung player an neih ṭhat zia pholanna hunah an hmang.
BCA tan hian Lalremsanga chuan point 17 score in an team tan basket a nei hnem ber, ani bakah hian Matthew Remtluanga Sailo leh Dennis Lalmuanpuia ten point 14 ve ve an score bawk. BCA hian tualchhung player hlangin Tuikual South 89-87 a an hneh tawh bawk avangin champion tura rinkai an ni.
MSL season hmasa ber pahnihna BCA coach Lalruatfela'n semifinal lut chiang tawh mah se hnehna chan vek an duh thu a sawi lawk ang ngeiin Serpents lakah zahngaihna an lantir lo.
Serpents hian season hmasa khan BCA hneh chungin semifinal an inhlangkai a, kuminah erawh beisei ang result an nei lo. League round-ah match li an khelh tawh aṭangin chakni hmel an la hmu lo a, relegation playoff an khelh a ngai dawn.