Icardi-a hattrick a tawk lo

Inter Milan captain Mauro Icardi-a'n Inrinni zan Serie A inkhelah goal thum ngawt khung mah se a team a chakpui zo lo. Season thara European football khelh tum Inter hi Fiorentina khelmualah 5-4 in an tlawm.

Fiorentina-in minute 23-naah Matias Vecino hmangin goal hmahruai an khung chu Inter lamin minute nga liam hnuah Ivan Perisic hmangin an sut a, chawlhlawk hmain Icardi chuan an goal hnihna a khung bawk.

Winger Federico Bernardeschi-a penalty pet chu Inter keeper Samir Handanovic-a'n a dan sak hnuah Fiorentina lamin Vecino, Davide Astori leh Khouma Babacar-a goal hnih hmangin an khung belh a, hun tawp hma minute thum chauh a awm tawh tihah Icardi chuan goal hnih khung belh mah se awmzia a nei thui tawh lo.

Argentina interna­tional Icardi hian tun season-ah league goal 24 a khung tawh a, Christian Vieri (2001) tih lohah chuan Inter player zinga khualmuala hattrick siam leh thei hmasa ber a ni.