FA Cup Final lut turin Chelsea-in Spurs an ngam

Chelsea chuan pen khatin nomawi pakhat an hnaih leh sawt ta - Premier League hmahruaitu hian league lama an elpui ber Tottenham chu Inrinni zan khan FA Cup semifinal-ah 4-2 in an hneh a, danglamna thlentu chu second half-a tlanlut Eden Hazard a ni.

Wembley Stadium-a in­khelah minute 70 thleng team pahnih 2-2 in inhnehtawk mah se minute 61-naa tlan luhtir Hazard-a'n danglamna thlenin an goal thumna a khung a, Nemanja Matic-a'n a khung chhunzawm leh bawk avangin London Derby-ah Chelsea an chak.

Thutlukna huaisen

Chelsea-in Premier League-ah hma hruai mek mah se an hnuai chiaha awm Tottenham aia an san zawkna chu khelh zat inangah point li chiah a ni. Antonio Conte-a'n a player rem danah FA Cup aiin Premier League a ngai pawimawh zawk tih a pholang a, April 25 zana Southampton nena an inkhel tur thlir ranin player a rem khawm.

Italian manager hian bench-ah a player chhuanvawr Eden Hazard leh Diego Costa a dah a, rin loh takin hmun chang khat tak Michy Batshuayi chu inkhel bul ṭantir a ni. Mahse, Conte-a'n coach fing bik a nihzia pholangin a hunah tak substitution a siam ta tho a, thutlukna a siam sual lo tih inkhelh zawhah a lang chhuak.

Inkhel hmuhnawm

Wembley-a inkhelah Chelsea-in minute ngana lekah goal hmahruai an khung nghal a, Willian chuan freekick aṭangin mawi takin a khung. Spurs an ngawi rei lo, goal an chhuah aṭangin minute 13 a liam hman chauh tihah an thiampuipa Harry Kane a inlar a, English striker hian si phurh sutna goal a khung.

Minute 43-na a ni a, goal khung tura inkhelhtir Son Heung-min hming lam hun a ni. Mahse, South Korean forward hi tun ṭum erawh goal khungtu ni loin goal khung tura lehlam pawl puitu a ni a, penalty area-a Victor Moses a tihtluk avangin penalty a chawi. Willian a lo pen chhuak a, Brazilian forward hian harsatna nei loin goal-ah a chantir.

Hazard inlan hun

Goal dang lut loin chawlh­lawk hman a ni a, Blues-in 2-1 in hma an hruai. Mahse, second half ṭan aṭanga minute sarih hnu lawkah Spurs-in tlawm an duh lo tih lantirin an si phurh sutna goal an khung a, English midfielder ṭhangduang Dele Alli chuan Christian Eriksen hnen aṭanga a ball hmuh ṭha zet chu goal-ah a chantir.

Conte-a'n thutlukna siam a hun tih hriain minute 61-naah Hazard leh Costa a rualin a luhtir a, a tisual lo. Belgian winger Hazard hian minuite 75-naah an goal hnihna a khung a, khel ṭha tluan chhuak zak Nemanja Matic chuan minute 80-naah an chak nemngheh nan kawh pawtin a pet goal bawk - Matic pet goal hi Hazard-a siam sak a ni.

Eng nge an sawi?

Chelsea manager Antonio Conte chuan, "Kan hnathawh hi ka chhuang takzet a, kei leh ka player-te tan a hlu a ni. England-a ka season hmasa ber a ni a, FA Cup leh Premier League nomawi beisei theia ka awm nghal hi ka lawm takzet. Coach nih chuan huaisen taka thutlukna siam a ṭul chang a awm ṭhin a, a chang chuan risk laka mawhphurhna zawng zawng phurh ngam a ṭul chang a awm ṭhin," tiin Hazard leh Costa inkhel bul a ṭan tir loh chhan a sawi.

Tottenham boss Mauricio Pochettino chuan, "Ka naute khelh dan ka chhuang a, kan tumah kan chiang em em. Mahse, target-a shot an neih vawi ngaah vawi li an khung a, keini chuan vawi liah vawi hnih chiah kan khung thung. Tuna kan tih theih awmchhun chu hmalam hun thlir a ni a, league-ah point lia kan phak loh mek avangin um phak ngei kan tum ang. Europe-a club ṭha ber pawl kan hmachhawn a, hei aia result ṭha zawk kan phu a ni. Mahse, hei hi football chu a ni si," a ti a, chak lo mah se a naute khelh dan a chhuang hle.