Wimbledon a hmuhnawm nghal

Sap ho ngaihsan, Mizo tena tennis tournament kan en lar hmasak, hranghlui deuhte lung tileng ṭhintu Wimbledon an khel ṭan - a ni hmasa ber aṭangin a hmuhnawm nghal hle. Champion lai Novak Djokovic chuan hnehna nen bul a ṭan nghal.

Fur lai a ni a, ruah sur avangin Centre Court chu a chung khuhna hman a ngai, nilenga hman ngai erawh a ni lem lo thung. Djokovic bakah Andy Murray leh Carlos Alcaraz te pawhin an khingpui ve ve an hneh bawk.

Number 1 Novak
Novak Djokovic chu seeded pakhatna a ni a, a match hmasa berah duhthusam takin khel nghal lo mah se a chak. Darkar hnih leh minute 27 chhungin Soonwoo Kwon chu 6-3, 3-6, 6-3, 6-4 in a hneh.

Hripui leng karah Djokovic hi tun season-ah a inkhel tam lo, grass court inelna lian hmachhawn tur pawh hi kum dang angin inbuatsaihna a nei ṭha tawk lo. Mahse, All England Club-ah player ṭha bik a nihna a lantir thei ta tho.

Grand Slam vawi 20 champion tawh Djokovic chuan, "Ka theihtawp tak meuhin ka khel dawn," a ti. Wimbledon a ngaih pawimawh chhan hi eng dang vang a ni lo, major tournament hmabak US Open leh Australian Open khel lo thei dinhmuna a la din vang a ni.

Tun dinhmunah US leh Australia rama zin tur tan hripui laka invenna lak a ngai. Djokovic chuan US Open khelh hmain hrileng vanga an ram inkaihhruaina chu an tih danglam hman hram a beisei thu a sawi bawk.

Murray a inlar
British miten tennis an ngaina a, ṭan tur an zawng ruai ṭhin. Hun rei tak hnuah Andy Murray an nei leh a, a vanglai chuan world number 1 hial a ni thei. Mahse, an fapa rangkachak hi a kum a tam hmain hliam vangin a buai.

Inkhelh erawh a chawlhsan mai phal bik lo, tun hnaiah pawh hliam vang bawkin a buai. Centre Court-ah erawh ṭantu a ngah a, inkhel hmuhnawm takah James Duckworth chu 4-6, 6-3, 6-2, 6-4 in a paltlang.

Murray hian a match lehpekah chuan John Isner a hmachhawn dawn. American player ṭha, service nei na zet Isner hian inkhel dangah Enzo Couacaud a lo hneh ve bawk; set nga an khelh chhungin Isner-a'n vawi 54 tehmeuh aces a siam.

Britain star Murray chuan, "Ka taksa pawh a ṭha, harsatna ka nei lo e," a ti. Wimbledon inbuatsaih lai khan pum lam chiang lo vangin a buai a, tournament a khelh lai pawh a khel zo thei lo, tunah erawh ngai a awh chho leh mek.

Inkhel dang
Carlos Alcaraz hi tennis ngainatute zingah a mikhual tawh lo. Clay court-a inkhel thiam bik hi grass court-ah pawh a ṭha tho, a match hmasa berah fiahna hmachhawn nghal mah se Jan-Lennard Struff chu 4-6, 7-5, 4-6, 7-6(3), 6-4 in a hneh.

Spanish tlangval Alcaraz chuan, "Ka khingpui kha player ṭha tak a ni a, tournament ropui taka ani ang player ka hneh thei kha ka lawm," a ti. Jan-Lennard Struff kha 6ft 4in zeta sang a ni a, service a neih ṭhat avangin hmachhawn a harsa - Alcaraz erawh a paltlang zo ta chuang lo.

Season hmasa semifinalist, kumina seeded pasarihna Hubert Hurkacz chuan beisei a phak lo. Player langsar zinga tla hmasa ber a ni a, nikuma Daniil Medvedev leh Roger Federer hneh theitu hian tunah chuan Alejandro Davidovich Fokina a ngam lo a ni.

Inkhel a hmuhnawmin an inchai tawk a, set nga an khelh hnuah Fokina zawkin 7-6 (7-4), 6-4, 5-7, 2-6, 7-6 (10-8) in hnehna a chang. Casper Ruud leh Jannik Sinner te an chak laiin, 2017 finalist Marin Cilic erawh hri leng a kai avangin a inhnuhdawh a ngai.