Man United-in De Jong an hnaih

Manchester United leh Barcelona chuan Frenkie de Jong chungchangah inremna an nei a, mahse inremna pumhlum erawh an la nei lo. Netherlands midfielder De Jong manah hian Man United hian euro maktaduai 65 (£56m) bakah a chet ṭhat dan a zirin sum pek belh an inhuam bawk.

Nipui transfer-ah United-in player lakluh an la nei lo a, De Jong lalut tur pawh hian kawng thui tak la awm mah se lalut turin beiseina sang tak an nei thei ang. United manager thar Erik ten Hag chuan nipui bazarah Frenkie de Jong hi a player lakluh tura a duh ber a ni a, an lalut thei a nih chuan Christian Eriksen lakluh pawh a awlsam sawt tura ngaih a ni.

Thawhṭanni khan Manchester United chuan manager thar Erik ten Hag hnuaiah training an ṭan. Carrington-a training zawm nghal zingah hian senior player David De Gea, Tom Heaton, Phil Jones, Victor Lindelof, Anthony Martial, Marcus Rashford, Jadon Sancho, Luke Shaw, Axel Tuanzebe leh Donny van de Beek te an tel.

Season thara inpuahchah nan Man United hian Thailand leh Australia te an tlawh dawn a, July 8 hian England an chhuahsan ang. United hian De Jong hi pre season-ah an hruai hman beisei a ni.