Vawiinah first round khelh zawh a ni dawn ; Durtlang, College Veng, Sialhawk leh Melbuk inlan hun

LBS Suzuki All Mizoram Inter Village Football Tournament 2022 first round chu vawiin hian khelh zawh a ni dawn.

Inelnaah hian team 204 an tel a, first round-ah hian team 152 inlanin team 52-in second round an lut nghal. Seeded a awm loh avangin second round lut saah hian team ṭha leh ṭha lo an inkat nuk a ni.

Vawiin hian player ena champion tura rinkai zinga an sawi Durtlang an inlan dawn a, team ṭha dang College Veng leh Hlimen bakah thingtlang aṭanga champion tum Sialhawk leh Melbuk te an inlan ang.

Durtlang chu
Durtlang hian CYMA Football-ah kum 2006 leh 2007-te khan final an lut tawh a, kum 2011 khan Red Ribbon Football final-ah Dinthar hnehin an champion. Team ṭha tia sawi ṭhin Durtlang hian ṭhangthar ṭha an nei a, champion tura rinkai zinga mi an ni.

Durtlang hian Mizo defender chak ṭha Mumbai City tana khel Hmingthanmawia (Valpuia), Sreenidi Deccan tana khel Lalchungunga bakah Aizawl FC wing back Lalfelkima te an kawl. ISL club Jamshedpur tana khel Ricky Lallawmawma pawh an nei a, ani hi defence leh midfield-a chhawr theih a ni.

Hnahthial tlangval tia sawi ṭhin Jeje Lalpekhlua leh Isak Vanmalsawma te Dur-tlangah an awm avangin Durtlang LC team tan an khel dawn a, Jeje erawh player angin inziak tho mah se coach hna chelh zawk turah a ngaih theih. Inelna ṭan hma hauhin Durtlang thawm a ring a, vawiin chawhnu dar 1:00 hian MZU Ground-ah Thenzawl West lakah an theihna phochhuah an tum ang.

Champhai District derby?
Champhai DFA-in tun thla khan Champhai district tan Upa C Keikhuma Memorial Inter Village Football Tournament an buatsaih a, chuta champion chu Melbuk an ni. Melbuk hi Mizo coach ṭha Lalsangzuala Hmar enkawl an ni a, champion-na tura player pawimawh Lalsawmzela, Ephraim leh Lallawmtluanga te vawiin chhun dar 11:00 hian Lengpuiah coach ṭha HC Zarzoliana enkawl Lamzawl hmaah fiahin an awm dawn - MPL-a mahni team champion-pui tawh coach pahnih inelna a nih bakah Champhai district inelna a ni nghal dawn.

Lengpuiah tho hian Champhai Kanan an inlan dawn a, tlai dar 1:00-ah Thenzawl East an hmachhawn ang.

Sialhawk hi R. Laldanmawia te khua a nih avangin hriat a hlawh a, tunah chuan 'Sialhawk Express Danmawia' chauh ni loin Crespo Lalhriatpuia leh Lalramhluna te an kawl. Crespo hi Hyderabad FC reserve tana player ṭangkai ni phak a ni a, Lalramhluna hi MPL club Ramhlun North-a khel ṭhin a ni thung. Tuichangral team ṭha Sialhawk khingpui tur hi Tuikual North an ni.

College Veng hian player an nei chhe lo a, Electric Veng FC coach hlui Ramlalthlamuanpuia (Sabito) enkawl niin Thinghlun an hmachhawn ang.

Mizo coach thawkrim ber zinga mi Lalremruata'n Tuithiang a enkawl a, team ṭha tia hriat ni lo mah se Tuithiang hi 'Giant Killer' ni thei an ni. Vawiin tlai dar 3:00 hian Tuithiang hi khaw fai vanga lar Biate nen an inkhel ang.