West Ham-in Rice chelh an tum

England international midfielder Declan Rice hian West Ham tan nomawi a la chawi lo a, ram tana a khelhpui Harry Kane ang thoin nomawi lian tham a la chawi lo.

Kum 23 mi Rice hi a khelhna Hammers a nih miau avangin nomawi chawi a harsa a, theihna a neih san avangin club lian mit a la. Tun nipui bazarah pawh Rice hi Chelsea nena sawizawm a ni.

London club Chelsea hian Raheem Sterling an dawr mek a, club neitu Todd Boehly chu transfer khawihtu zinga a tel avangin an thawm pawh a ring.

Rice hian Hammers-ah kum hnih contract a nei a, Hammers hian kum khat chhung atan an pawtsei leh thei bawk. Mahse tun thleng chuan Rice hian contract a ziah belh lo.

Amaherawhchu Rice hian chhuah duh pawh ni se Hammers hian a man atan hian pound maktaduai 150 tal an chhiar a, chhuah an phal lo tawp, tia sawi a awm bawk. Chelsea emaw Europe club lian dang emaw pawhin Rice hi an la chhuak dawn a nih chuan sum an insen huai a ṭul dawn a ni.