Centre Court-ah Raducanu a chak

Emma Raducanu chuan a vawi khat nan Wimbledon khelhna hmunpui ber Centre Court-ah tennis a khel ve ta, tennis stadium an ngaihhluta a match hmasaah hian Alison van Uytvanck chu 6-4, 6-4 in a hneh.

US Open champion hlui Raducanu chuan, "Ka tan chuan ni chhinchhiah tlak tak a ni. Centre Court hlutzia ka hria, tun ṭum atan chuan ka tana siam ni maiin ka hria," tiin a naupan lai aṭanga a inkhelh chakna hmun chu nuam a tih thu a sawi.

British tleirawl hian a match lehpekah chuan Caroline Garcia a hmachhawn dawn. World number 4 hlui Garcia hian inkhel dangah wildcard hmanga inlan Lily Miyazaki chu 4-6, 6-1, 7-6 (10-4) in a lo hneh ve bawk.

Khawvel barakhaihin Raducanu hian US Open title a la thei a, a hnu lamah erawh ropui takin a la khel chhuak leh rih lo. Wimbledon hi atan hun ṭha a ni thei tura ngaih a ni, tualchhung fans lamin nasa taka an ṭan dawn avangin beisei pawh a nei sang ang.

Inkhel dangah Ons Jabeur a chak. World number 2 hian Mirjam Bjorklund chu 6-1, 6-3 in a hneh. Hmanni lawk khan Tunisian nula hi Eastbourne International aṭangin a inhnukdawk, tunah erawh a khup hliam a dam tawh a ni.

Hming langsar Anett Kontaveit leh Angelique Kerber te pawhin an match hmasa berah hnehna an chang a, amaherawhchu seeded pasarihna Danielle Collins erawh hneh nei loin a zinkawng a tawp nghal.