Bale-a'n MLS a pan ta

Welsh legend Gareth Bale chuan thla 12 chhung khel turin Major League Soccer club Los Angeles FC a zawm ta a, a ṭul dan a zirin kum 2024 season khel turin a contract hi pawhsei theih a ni ang.

Real Madrid tan kum kua zet a khelh hnua USA pantu Bale chuan, "LAFC ka zawm thei hi ka hlim takzet a, a hunah tak, a hmunah tak kei leh ka chhungte nena kan kal thei hi ka lawm a ni," a ti.

LAFC co-president John Thorrington chuan, "Gareth hi a hunlaia player zinga player ṭha leh hmuhnawm bik a ni a, level sang bera a theihna pholang a, tawnhriat lo nei tawh kan lalut thei hi kan club tan chuan hmasawnna tur a ni.

"He hun kan thlen theih nana tha thawhtu Gareth-a management team chungah lawmthu ka sawi a ni," a ti a, "Gareth hian nomawi chawi zel a duh tih a chiang a, kan club zawm thlang a, kan beisei nomawi min hlawhchhuahpui a tum tur hi kan hlim hle," a ti bawk.

LAFC head coach Steve Cherundolo chuan, "Khawvelah hian Gareth-a anga match-a danglamna thlen thei player hi an tam lo. Kil tina player hlauhawm ni thei a ni a, kan team ṭha tawh tak hi a tih ṭhat belh ngei ang.

"Football a hriatna leh level sang taka a tawnhriat neih ṭhat hi kan tan a ṭangkai dawn a ni," a ti - LAFC hian Bale hma hian Italy legend Giorgio Chiellini an lo lalut tawh bawk a, player an nei hrawl ta hle.

LAFC hian Bale hi 'targeted allocation money' (TAM)huanga an lakluh thu an puang. MLS-ah hian club-te chu player hlawh atana hman phal zat bituk sak an ni a, salary cap-in a huam loh turin player pathum an lalut thei a, 'designated player' tih an ni.

Designated player lo zawng hi TAM chhungah an awm a, Bale hian a tam berah season khatah dollar maktaduai 1.6 aia tam a hlawh dawn lo tihna a ni - Chiellini pawh TAM chhungah tho a awm.

Mahse, Bale hian a contract hi a pawtsei a nih chuan designated player-ah a awm dawn nia sawi a ni a, MLS-a player langsar Lorenzo Insigne ($12.42mtd, Toronto FC), Xherdan Shaqiri ($8.15mtd, Chicago Fire) leh Javier 'Chicharito' Hernandez ( $6mtd, LA Galaxy) te a phak lo hle.

MLS-ah hian European football-a hriat ni lem lo, dan mak tak tak an hmang nual - LAFC hian Bale an lakluh avang hian David Beckham-a club Inter Miami chu zângnadawmna $75,000 an pe.

US top flight league club-te hian Discovery List tih chu an nei ṭhin a, hetah hian MLS player ni lo, an thlithlai mekte chu pasarih thlengin an dah thei - Miami hian Bale hi discovery list-ah an dah a, LAFC lamin an lak avang hian discovery list-a Bale neitu Miami hi pawisa an pe ta a ni.

Bale hian hliam leh nungchang avangin Real-ah a hun tawp lam hmang ṭha tawk lo mah se a theihna sanzia erawh inhrilh nawn a ngai lo. Kum 2013 khan a hunlaia footballer man to ber ni turin Real chu pound maktaduai 85-in a zawm.

Real tan hian match 258 khelin goal 106 a khungsak a, assist vawi 67 a nei. La Liga (3), Copa del Rey (1), Supercopa de España (1), Champions League (5), UEFA Super Cup (3) leh FIFA Club World Cup (3) ah a champion pui a, Real legend tia koh a phu.