Chelsea-in Sterling lakluh tumin City an dawr

Nipui transfer-a player lakluh la nei lo Chelsea chuan Raheem Sterling lakluh ngei an duh a, Manchester City forward lakluh tum hian Premier League champion club hi an dawr.

Chelsea hian official takin Sterling an ngamna zat hi la thehlut lo mah se City erawh an be lawk tawh a, Etihad Stadium-a hlim lo forward hian a puanthuah telin Stamford Bridge lam a pan ngei a rinawm ta hle.

Sterling hian City-ah kum khat châm turin contract la nei mah se khelmuala hun tam zawk hman a duh avangin chhuah a duh a, Pep Guardiola-a'n chelh luih a tum dawn lo niin an sawi.

City legend
Sterling hian kum 2015 khan pound maktaduai 49-in City hi a zawm a, match 339 a khelhsakah goal 131 khungin assist vawi 95 a nei - Premier League nomawi a chawipui bawk.

Kum 27 mi Sterling hian City tan Premier League (4), FA Cup (1), League Cup (4) leh Community Shield-ah te champion nomawi a chawi tawh a, Champions League nomawi erawh a la chawi lo.

Pep-a'n kum 2016-a Etihad Stadium a pan hnuah City tana goal khung hnem ber chu Sergio Aguero (124 goals) a ni a, a dawttu chu Sterling (120) a ni. Mahse, heti chung hian Sterling-a'n chhuah a duh tlat.

A chhan
City-a Sterling-a sulhnu a ropui a, fans-in an ngaina bawk. Mahse, English forward hian Pep-a 'system' a player inluh chhawk reng a duh lo a, hmun laili chan a, game pawimawha inlan zel a duh.

England international hian season hman zawh takah khan inelna hrang hrangah match 47 khelin goal 17 a khung a, assist vawi kua a nei. Mahse, heng zinga match 32-ah chauh bul a ṭan a, a bul ṭanah pawh vawi riat lakchhuah a ni.

Mahse, Pep-a'n a first XI a siksawi ngun hrim hrim - league bikah phei chuan City attacking player zinga Sterling aia bul ṭan tam fal chu Bernardo Silva chiah a ni a, vawi 33 bul ṭanin Sterling hian vawi 23 bul a ṭan a, Phil Foden (24 start), Jack Grealish (22), Gabriel Jesus (21) leh Riyad Mahrez (15) te pawhin bul an ṭan tam bik lo.

Mahse...
Sterling tana tlawmthlak tur erawh Champions League semifinal-a Real Madrid an hmachhawnna match hnihah bench-a dah a ni a, Premier League-a an match tawp bera Aston Villa an hmachhawnin bench-ah dah a ni bawk.

Villa lakah hian bench aṭanga a luh hnuah danglamna a thlen a, 2-0 a an hnufual hnua City an 'comeback' theih nana Ilkay Gundogan goal khung tur chu a siamsak a ni - Liverpool aia point khata sangin an champion.

Mahse, City hian nipui transfer-ah Borussia Dortmund aṭangin Erling Haaland an lalut a, Norwegian forward hian hmun pawimawh a chang dawn tih a chiang a, Argentina forward Julian Alvarez-a'n January-a inremna a neihpui tawh City hi River Plate aṭangin a zawm bawk - khelh tam duh Sterling tan chhuah mai hi thutlukna dik a ni.