Milian ngamtu Palace hmaah Spurs
Tottenham Hotspur-in Premier League nomawi chawi turin hmahruaitu Chelsea chu point liin an phak lo mek a, match ruk bak khelh tur an nei tawh lo. Zanin dar 12:30-ah Crystal Palace an lenchilh dawn a, FA Cup semifinal aṭanga pet chhuaktu Chelsea-in hnai taka an thlir tawh nomawi chhuhsak turin chak loh a thiang lo ang.
Crystal Palace-in Sam Allardyce hnuaiah harhtharna changin an hmaa team ṭha zawk nia ngaih an hneh fo a, tlak hlauhawm dinhmun aṭanga tal chhuak turin an match hnuhnung pariatah vawi ruk an chak - heng zingah hian Arsenal, Chelsea leh Liverpool an tel avangin Big Sam-a naute an te lo tih a chiang a, Spurs tan inthlahdah ngawt chi a ni dawn lo.
Ehiogu tan
Tottenham Under-23 coach Ugo Ehiogu chu April 21 khan lungphu chawlin a thi a, kum 44-a upa a ni. Spurs striker chhuanvawr Harry Kane chuan England defender hlui Ugo Ehiogu tan Premier League nomawi chawi ngei an duh thu a sawi a, zaninah chak result nen bul ṭan a duh ang.
Kum 23-a upa striker chuan, "Ugo hi training ground a hrawn nuam tak a ni a, a kianga awm nuam tak a ni. Ehiogu tan kan theihna zawng zawng nen league nomawi chawi ngei kan tum dawn a, mah se match ruk khelh tur hautak em emin min la hmuak reng a ni," a ti a, nomawi chawi ngei duh mah se a awlsam dawn lo tih erawh a pawm.
Palace dinhmun
Crystal Palace tan defender James Tomkins chu Anfield-a Reds an hneh ṭuma a inhliam avangin a inlan thei dawn lo chiang a, Scott Dann a la dam chian loh bawk avangin tlarhnung laiah Martin Kelly leh Mamadou Sakho an inkawp rin a ni.
Palace-in Liverpool an ngam ṭumin tha an seng hnem a, coach Big Sam-in a naute an chau tih a hai lo. English manager chuan, "Ka nauten an theihna zawng zawng an pek avangin an chau a, Spurs nen kan inkhelh hunah chuan team thlak danglam a ngai nasa dawn a ni," a ti a, zaninah team a siksawi a nih pawhin a mak lo ang.
Beidawng lo Poch
Tottenham-in FA Cup an beiseina Chelsea-in tih tawp sak tawh mah se Premier League nomawi erawh chawi ngei an tum a, manager Mauricio Pochettino chuan league nomawi chawi tura Blues an um tur thu a sawi.
Argentine manager chuan, "Ka la beidawng lo. Team ṭha tak ka nei a, FA Cup-ah kan chak loh avangin hnual mah ila Premier League-ah Blues umphak ngei kan tum ang," tiin a sawi a, nomawi chawi loa season mangṭha a tum lo.
Kane vs Benteke
Tottenham-in tlarhmaah Harry Kane an nei a, English striker hian league match 24-a khelh tawhah goal 20 a khung avangin Palace tlarhnung tan ven bik a sual lo ang. Chutihruala an hriatreng tur erawh Dele Alli a la awm cheu tih hi a ni - kum 21 leka upa midfielder hian league-ah goal 16 a khung tawh a, ngaihthah bik a fuh lo ang.
Spurs-in Kane nei mah se Palace-in Christian Benteke an nei ve tho. Belgian striker hi Liverpool laka goal hnih khung hlim a ni a, league-ah goal 14 a khung tawh. Palace hian Benteke thlawp turin Wilfried Zaha leh Andros Townsend an nei bawk a, Big Sam-a'n players a thlak kual tur thu a sawi avangin an inlan ngei dawn leh dawn loh erawh a chiang lo.
Zanin Inkhel Tur
Arsenal 12:15 AM Leicester City
Middlesbrough 12:15 AM Sunderland
Crystal Palace 12:30 AM Tottenham
April 27, Ningani
Manchester Ciy 12:30 AM Man United