Sub Junior NFC Semifinal-ah Mizoram Vs West Bengal

Sub Junior National Football Championship semifinal-ah tukin zing dar 7:30 hian Mizoramin Municipal Corporation Stadium, Calicut-ah West Bengal an hmachhawn ang a, tlai dar 4:15-ah Meghalaya leh Kerala ten final lut tur an zawng bawk ang.

West Bengal bawk!

Mizoram junior team­in Khelo India-a mipa football inelna bika champion turin West Ben­gal final-ah an hneh. Senior team-in Santosh Trophy semifinal-ah West Bengal an hneh lo thung. Inelna pahnihah hian chak zawk zawng turin penalty shootout hman ve ve a ni.

Tun ṭumah hian Mizo­ramin semifinal lut turin Uttar Pradesh (3-0), Madhya Pradesh (2-0) leh Odisha (5-2) te an hneh a, group match hnuhnung berah Kerala nen 2-2 in an inhnehtawk thung.

Mizoram tan hian Ko­lasib Venglai rawlthar Lalnunsanga'n goal li khungin J. Lalbiakliana (Armed Veng South) leh Zo­­sangpuia (Tlungvel Veng­thar) ten goal thum ve ve khungin, Lalrokima (Lunglei) leh Lalrempuia Hmar (Ramthar Veng) ten goal khat ve ve an khung bawk.

West Bengal erawh Goa aia goal difference ṭhat vang chauhin Group B aṭangin an tlang a, team ṭha bik tiha sawi tur an ni lo.

Mizoram manager Zai­hmingthanga chuan, "Eng team pawh hian Mizoram an hmachhawn chuan an theihna zawng zawnga an khelh ṭhin avangin a harsa sawt ṭhin a, semifinal a nih tawh avangin a awlsam lo bawk ang. Final thlen ngei erawh kan beisei," tiin Vanglaini palai a hrilh.

Meghalaya an ṭha

Record aṭanga thlir chuan tun inlenaa che ṭha ber chu Meghalaya an ni a, NorthEast state aiawh pakhat zawk hi match li an khelhah an chak fai vek a, goal 23 zet khungin goal khat chiah an chhuah. Meghalaya hian Mizoram hmachhawn tur West Bengal hi 4-1 in an sawp tawh a ni.

Amaherawhchu, Me­ghalaya hmachhawn tur Kerala hi inelna thlengtu an nih bakah Mizoram draw thei an ni a, chak tur chiang a awm lo.

Semifinal - Vawiin Inkhel Tur
7:30 AM Mizoram Vs West Bengal
3:45 PM Meghalaya Vs Kerala
Final - April 28, Zirtawpni