Kawng a la inhawng - Wenger
Arsenal manager Arsene Wenger chuan Premier League table-a a sang pali zinga tel turin kawng a la inhawn thu a sawi. Gunners hian zanin dar 12:15 hian Emirates Stadium-ah nomawi kawltu Leicester City an lo mikhual ang.
Kum 20 chhung Wenger-a'n Arsenal a enkawl hnuah a sang pali zinga tel loh an la nei ngai lo. Tun dinhmunah Gunners hi pasarihna an ni mek a, palina Manchester City aiin point sarihin an hniam a, match sarih khelh hmabak an la nei.
Nimin tlaia thuthar thehdarhtute a kawmnaah Wenger chuan, "Champions League khel turin kawng a la inhawng, mah se chetsual a thiang tawh lo thung. Thil theih a la nih rualin sawisel boa kan kal a ngai tawh a, kan inkhelh apiangah chak duha kan tuihal a ngai takzet," tiin a sawi.
Wenger chuan sawi chhunzawmin, "Manchester City kan hneh khan inrintawkna min pe ngei anga, huaisen leh thatho taka kan khel a nih chuan eng team pawh kan hneh thei ang," a ti.
FA Cup semifinal-ah Arsenal hian si an phurh zet hnuah Manchester City chu Alexis Sanchez leh Nacho Monreal te goal hmangin 2-1 in an lehthal. Leicester City manager Craig Shakespeare chuan an khingpui tur inkhel hi a lo en uluk hle.
Foxes boss Shakespeare chuan, "Arsenal inkhel lai ka en a, an club chhungah buaina leh inlungrual lohna a awm an tih hi kei chuan ka ring lo. Player zawng zawngin club tan an theihtawp an chhuah. Hun tawp thlengin huaisen takin hnehna chan tumin an bei hram hram a ni," a ti.
Premier League champion Leicester hian nomawi chawi puitu Claudio Ranieri an ban hnuah Shakespeare enkawlna hnuaiah harhtharna an chang, relegate hlauhthawnawma ding kha 15-na an ni leh tawh. Tla thei dinhmuna ding mek Swansea City aiin point rukin an sang zawk.
Leicester hian captain Wes Morgan leh an club player man to ber Islam Slimani te chu hliam vangin Emirates Stadium-ah an hruai thei dawn lo. Nipui transfer laia Arsenal-in lakluh an tum Jamie Vardy chu inlan ngei tura ngaih a ni. Season hmasa a Foxes champion puitu striker hian Gunners sawmna hnawlin a club tan contract a pawt sei ta zawk a ni.