Pandey-i'n Olympic medal a beisei

Tui hleuhna hmun 'pool' chu engtiangin nge a awm a hmu thei lo a, mahse tui awm dan chu a deh aṭangin a hre thei; a bengin ri a hre thei bawk. Mitdel Kanchanmala Pandey chuan 2020 Tokyo Paralympics-ah India tan medal lak theih ngei a beisei thu a sawi.

Amaravathi, Nagpur-a cheng Pandey hi a mitdel mah se a rualban lohna a inhnehtir duh lo a, kum 10 a nih aṭangin tuihleuh khawvel a luhchilh a, vohbik te inelnaah medal 110 chuang zet a la tawh.

Kanchanamala-i medal lak zingah 2006 Melbourne Com­monwealth Games-a paruk ngawt a lak kha a tel a, Asian Games-ah medal pakua la tawhin national level-ah medal 50 a la tawh bawk.

Kanchanamala chuan, "Tui­hleuh thiam midangte chuan goggles an hmang ṭhin. Kei erawh pian tirh aṭanga mitdel ka nih avangin hetiang hmanrua hi ka mamawh lo thung. Ka bengin ri a hre thei a, ka elpuite thawm ka hre thei. Ka ri hriatna hian inelna huangah min pui nasa hle," a ti.

A hmathlir sawi nghalin Kan­chanamala chuan, "Ka hma hunah hian tih tur tam tak la niin ka inhria a, tuna ka ngaihpawimawh hmasak chu Asian Para Games leh Olympics te an ni. 2020 Tokyo Paralympics-ah hian India tan medal ka lak ngei theihna turin ka bei ang," tiin a sawi.

Olympic neih kum hian an neihna hmunah vohbikte tan Pa­ralympics neih nghal ṭhin a ni. Nikum Rio Olympic-ah pawh khan sulhnu mak leh ropui tak kan hmu hial.

Brazil khawpuiah khan Mitdel Abdellatif Baka chuan mipa khawhmuh fiah lote inelna 1500m (T13 class)-ah ropui takin hnehna a chang. Maracana Stadium-a intlansiakah Baka hian gold medal dawng tur hian minute thum leh second 48.29 chiah hun a hmang.

Rio Olympic mipa 1500m intlansiaka pakhatna Matthew Centrowitz Jr. khan minute thum leh second 50 hun a hmang thung - fuke kim, piangphunga dik lohna nei lo aiin Baka hi a chungnung zawk fe tihna a ni.

Hei mai hi a la ni lo - Rio Olympic-ah khan mipa 1500m intlansiaka pahnihna Taoufik Makhloufi (3:50.11) leh pathumna Nick Willis (3:50.24) te kha Para­lympic-a pahnihna Ethiopian athlete Tamiru Demisse (3:48.49) leh pathumna Kenyan tlan chak Henry Kirwa (3:49.59) te pawhin an khum hneh hle a, rualban lo zinga pathumna ai pawhin Rio Olympic-a pakhatna United States tlangval khan tlan chen inangah hun a hmang rei zawk tihna a nih chu!