Vanglaini Zirchianna ; Mizoram player-ten goal an khung hnem ber

I League-ah khawvel hmun hrang hrang aṭangin player an fuankhawm a, India ram hmun hrang hrang aṭangin player thurchhuah an ni bawk - Mizoram player-te an che ṭha hle.

Vanglaini chuan I League-a goal luh dan a zir chiang a, India ram club inelna sang berah hian Mizoram player-te chuan goal 25 an khung tawh a, anmahni hnaihtu Manipur leh Goa player-te goal khung belhkhawm ai pawhin a tam zawk!

Goal 205

Tun season I League-ah match 85 khelh a ni tawh a, goal 205 a lut tawh. Match khata goal 2.41 lut zel ang a ni a, chawhruala goal lut tam lamah Europe-a league sang pali Premier League (2.82), La Liga (2.88), Bundesliga (2.8) leh Serie A (2.87) te a tluk lo.

Goal 205 zingah goal pathum chiah mahni lama tihluh (own goal) a awm. Minerva Punjab defender Love­day Okechukwu leh Churchill Brothers defender Banpynkhrawnam Nongkhlaw ten Aizawl FC tan goal khat ve ve an khung sak a, Bengaluru FC defender John Johnson-a'n Chennai City goal khat a khung sak bawk.

Tihsual a awm!

Aizawl FC leh East Bengal te tun season I League match hmasa bera an inhmachhawn ṭumin Bayi Kamo Stephane ball chanlai chu Kolkata club defender Gurwinder Singh-a'n petchhuah a tumna lamah an lamah chiang takin a pet lut. I League official-ah chuan goal khungtu hi AFC striker Kamo hminga ziah luh a ni.

January 18 khan Tilak Maidan-ah Mizo tlangval Lalrindika Ralte-in corner kick aṭangin a pet lut a, goal ropui a ni. Amaherawhchu I League official-ah chuan Churchill Brothers keeper Priyant Kumar tibuaitu East Bengal defender Ivan Bukenya khung anga ziah luh a ni.

Replay-ah Ugandan defender hian a khawih fuh loh ang bawkin Bukenya pawh hian a tih-goal a ni lo tih a pawm thlap.

He goal pahnih hi Mizo club leh Mizo player inrawlhnaa tihsual pahnih a ni a, hei lo pawh hi ziah dik lo awm thei a ni. Chu ti chung chuan tun ṭuma kan zirchianna atan hian I League statistics-a an dah dan rin a ni.

Mizoram leh goal

India ramah tluklehdingawn khat chuang mihring an awm tawh a, Mizoramah hian nuai 10 chuang awmin India rama Mizo awm zat chu 0.09% vel lek a ni.

Football-ah erawh Mizoram hi a te tawh lo a, I League match khat khelh tur la awma table chung bera awm chu Aizawl FC an ni.

Mizo club chet ṭhatzia India ram pumin a hre tawh a, an la hriat hmaih tur chu Mizoram player-ten goal an khung tam tih hi a ni.

Mizo zinga hming langsar ber Jeje Lalpekhlua'n Mohun Bagan tan goal nga a khung tawh a, Mizo zinga khung hnem ber a ni.

Aizawl FC winger pahnih Brandon Vanlalremdika leh R. Laldanmawia ten goal thum ve ve khungin Shillong Lajong forward Samuel Lalmuanpuia'n goal thum a khung tawh bawk.

Lajong winger Isaac Vanmal­sawma Chhakchhuak leh DSK Shivajians attacking midfielder Jerry Mawihmingthanga ten goal hnih ve ve an khung.

Player dang pasarih Daniel Lalhlimpuia (Bengaluru FC), Lalhmangaihsanga Ralte (Bengaluru FC), Lallianzuala Chhangte (DSK Shivajians), Lalramchullova (Aizawl FC), Lalrindika Ralte (East Bengal), Lalruatthara (Aizawl FC) leh Zohming­liana Ralte (Aizawl FC) ten goal khat ṭheuh an khung bawk.

I League-ah Mizoram player 13-in goal an khung tawh a, an goal khung zat chu 25 a ni. Mizoram aṭanga goal chhuak hi state emaw ram (India ram chhiar tel lohin) ang pawhin tluk teuh emaw hnaih pha an awm lo.

Mizo an ṭha fal

Mizoram club Aizawl FC hi Mizoten goal an khung tamna chhanah a ngaih theih a; amah­erawhchu Aizawl FC-a Mizo player goal kaw (9) khung chhiar tel loh pawhin state dang emaw ram dang pawhin Mizoram player-te goal khung an la pha chuang lo!

Khaw nge state ropuite?

Goa hian Churchill Brothers an nei a, Goan player goal khung zat chu 11 chauh niin Mizoram player goal khung chanve pawh a pha lo.

Club pahnih nei thei West Bengal player-te goal khung record a la chhe zawk a, Bengali player zingah goal hnih khung thei pawh awm loin an goal khung belhkhawm chu goal ruk chauh a ni.

Heng state pahnih hi Santosh Trophy hnuhnung bera Mizoram tluk lohte an ni a, amaherawhchu I League-ah Mizoram player-te an che ṭha zawk tawh.

Hei chauh hi a ni lo, I League ang thoin West Bengal-in Santosh Trophy-ah state dang player an hmang nasa a, sulhnu nei ṭha mah se inelna sangah Bengali player ṭha an vang ta hle.

Mizoram el pha teuh ber Manipur-in I League club nei lo chungin goal 13 an khung thei a, an record hi dahhniam theih a ni lo. Tun dinhmunah Mizoramin Northeast powerhouse nihna chu Manipur aṭangin a chhuhsak tawhah a ngaih theih a, amaherawhchu record thlirin inthlahdah a la thiang lo.

Nigeria leh ram dang

India ramah Nigerian player an tam a, amaherawhchu tun season-ah goal khung lamah ni loin goal venhim kawngah an pawimawh. Nigerian player-in tun season I League-a goal an khung zat chu goal ruk chauh a ni.

East Bengal leh Churchill Bro­thers-in Trinidad and Tobago forward Willis Deon Plaza (7 goals) leh Anthony Anton Wolfe (4) te an kawl a, goal an khung theih ve ve avangin ram pawn aṭanga goal khung tam ber ram an ni.

Khawvel pum huapah football khelh thiam vangin Brazil lar mah se India rama rawn khelte erawhin an ram an tihming ṭha pha lo. Brazil player-ten goal 9 an khung a, an tluk loh chu Trinidad and Tobago, Cameroon leh Haiti te an ni.