Premier League-ah Magpies an kir
Newcastle United-in Championship-ah rei tak tal an tum lo - Thawhṭanni zan khan an mikhual Preston North End chu 4-1 in an sawp a, season thara Premier League khel turin an inpetkai ve leh ta.
Rafael Benitez-a naute inpetkai hma hian Brighton & Hove Albion chu Premier League khel turin an inhlangkai tawh a, league match hmabak pahnih khelh tur la awma chiang lo awmchhun chu champion tur chauh a ni tawh.
Goal a sur
St. James' Park-a inkhelah Magpies-in minute sarihna lekah Ayoze Perez hmangin hma an hruai a, Preston-in minute 14-naa Jordan Hugill goal hmangin chhanglet ve nghal mah se a bak zawng chu Newcastle chan a ni tawh.
Magpies-in an match hnuhnung pathum aṭangin point khat chiah hlawh chhuak mah se Preston lakah tawlthluk an tum tawh lo. Christian Atsu-a'n an goal hnihna a khung hnuah Preston forward Paul Gallagher chu hnawhchhuah niin penalty a chawi bawk a, Matt Ritchie-a'n goal-ah a chantir. Minute hnih hnu lawkah Perez chuan a goal hnihna khung ve lehin Magpies an chak chiang hle.
Chhandamtu Benitez
Newcastle United-in Premier League aṭanga relegate thei dinhmuna an din laiin March 2016-ah Benitez an lalut a, UEFA coach of the year ṭum hnih lai ni thei manager hian Magpies hi an relegate a nih chuan a chhuahsan theihna dan a contract-ah a ziak tel thlap.
Spanish coach-in thla hnih chhung lekin Magpies a chhanhim zo lo a, a sulhnu ropui tak enin St. James' Park a chhuahsan ngei rin a ni. Mahse, fan-ten Liverpool tana Champions League nomawichawitu coach hi cham turin an ngen a, "Fan-ten min hmangaihna hi ka tan hnar a harsa a ni," tiin Newcastle a pan hma lawka Real Madrid enkawltu manager a cham a, kum thum daih contract a ziak - Magpies fan-te tan he manager hi a hlu a ni.
Benitez-a hlim
Magpies manager Benitez chuan, "Ka player, staff leh he club chhungkuaa mi leh he khawpuia cheng mipui zawng zawngte ka lawmpui takzet a ni. League harsa takah kan inlan avangin zinkawng a hautak a, inthlahdah hauh loa kan kal reng a ngai. A tawpah erawh kan duh ber kan hmu a, ka hlim takzet," a ti.
Valencia a enkawl laia La Liga nomawi pahnih chawi thei coach chuan, "Season ṭantira mi zawng zawngin an sawi chu Premier League-a kir lehnghal a ni a, chu chuan vawiin hlutna hi a belhchhah a ni. Ka tawnhriat neih tawh aṭanga thlirin squad chanve thlak chunga a chung lama awm harsat zia ka hria a, kan tan chuan vawiin result hi a pawimawh takzet," tiin a hlim hle.
Zinkawng hautak
Manager langsar Benitez-a'n kum 2001-a Valencia a enkawl hnua a vawi khat nan second division-ah team a enkawl a, Newcastle-in Europa League-a Chelsea champion puitu coach hnena lawmthu an sawina chu sum a ni - Spanish manager hian transfer bazara-h pound maktaduai 50 ngawt a seng a, Championship chanchina squad manto ber player a remkhawm.
Benitez-a'n holam takin sum a khawhral lo. Crystal Palace striker Dwight Gayle leh Bournemouth winger Matt Ritchie lakluh nan pound maktaduai 22 a seng a, player pahnihin league-a an goal khung zat belhkhawm chu 34-a a ni. Hriatreng tur erawh Benitez-a'n relegate rualin a player langsar Moussa Sissoko, Georginio Wijnaldum leh Andros Townsend te a chan a, anni hmun ruak luahkhat tura player remkhawm hi hna hautak a ni - Magpies zinkawng hautaka midfielder Jonjo Shelvey hnathawh hmuh hmaih theih a ni lo bawk.
Benitez hma hun?
Premier League-ah Magpies an kir a, club legend Alan Shearer a ṭawng chhuak nghal. English striker ropui chuan, "Benitez chelh tur chuan transfer-naa hman tur sum tam tak pek a ngai. Engkim hi Magpies kutah a innghat tawh, khawiah nge awm an duh? Relegation battle hmachhawn nge a sang zinga awm? Rafa duh tur chu kei chuan ka hre chiang," tiin Spanish manager chuan Premier League club tikimtu mai nih a duh loh tur thu a sawi.
Newcastle coach hlui Steve Stone chuan, "Fan-ten Benitez hi an lawm takzet a, ani pawhin an ngainat zia a hria. Mahse, team ṭha tak din tur chuan sum a mamawh a, a mamawh ang hi pek mai tur a ni. Benitez-a'n Newcastle a mamawhna aiin Magpies-in Benitez an mamawhna hi a sang zawk a ni," a ti a, Newcastle chu Benitez chelh tum turin a ti.